Rikthehen atentatet për hakmarrje në qytetin e Elbasanit. Bledar Muça, një emër ky i njohur për policinë, ka mbetur i plagosur me breshëri kallashnikovi teksa po lëvizte me automjetin e tij, në shoqërinë e mikut të tij, Florenc Çapja, edhe ky i dyshuar për disa ngjarje kriminale. Ngjarja e rëndë ndodhi paraditen e djeshme, vetëm pak metra larg Drejtorisë së Policisë së Qarkut të Elbasanit, prokurorisë dhe gjykatës së këtij rrethi.
Burime zyrtare nga policia lokale bënë me dije se një person ende i paidentifikuar, i cili ishte ulur në ambientet e jashtme të një lokali buzë rruge, ka qëlluar me armë zjarri në drejtim të makinës tip “Volkswagen Golf” me targë AA 997 NE, që drejtohej nga 37-vjeçari Bledar Muça.
Mësohet se nga breshëria e plumbave ka mbetur e plagosur aksidentalisht edhe një grua, kalimtare e rastit. Bëhet fjalë për 49-vjeçaren Matilda Kermezo, efektive e Policisë së Shtetit. Atentati i tipit mafioz ka shkaktuar panik te qytetarët, ndërsa efektivët blu kanë shkuar shpejt në vendngjarje dhe kanë nisur hetimet. Pas kryerjes së veprimeve hetimore paraprake, dyshohet që ngjarja të ketë si motiv hakmarrjen ndaj fisit Çapja. Është hera e dytë që 35-vjeçari Florenc Çapja dhe miku i tij Muça i shpëtojnë atentatit. Të dy këta persona mbetën të plagosur në masakrën e 3 shkurtit të këtij viti.
ATENTATI
Katër muaj pas atentatit të ndodhur në lagjen “Emin Matraxhiu” të qytetit të Elbasanit, ku u ekzekutuan 3 persona dhe mbetën të plagosur 8 të tjerë, një tjetër atentat u shënua rreth orës 10:00 të ditës së djeshme. Mësohet se Bledar Muça ka qenë duke udhëtuar me automjetin e tij në rrugën “28 Nëntori”, kur në një moment, shumë pranë ish-Spitalit Kirurgjik, një mjet tjetër tip “Ford Focus” me targë AA 234 TR i ka prerë atij rrugën. Kjo ka bërë që Muça të ulë shpejtësinë.
Në këtë moment, përbri tij, një person, i cili ishte ulur në karriget e jashtme të një lokali, ka nxjerrë menjëherë armën nga një çantë sporti dhe ka qëlluar me breshëri në drejtim të makinës që drejtohej nga Muça. Për pasojë, 37-vjeçari ka mbetur i plagosur. Ky i fundit ka devijuar nga rruga, duke hyrë në oborrin e ish-Spitalit Kirurgjik të Elbasanit, me qëllim që t’u shpëtojë plumbave të autorit.
Menjëherë kanë ndërhyrë uniformat blu, të cilët kanë dërguar urgjentisht në Spitalin Kirurgjikal të Elbasanit dy të plagosurit, Bledar Muçën dhe policen Matilda Kermezo. Sipas bluzave të bardha, dy të plagosurit ndodhen jashtë rrezikut për jetën. Pas dhënies së ndihmës së parë mjekësore, efektivja 49-vjeçare u dërgua në Tiranë për mjekim më të specializuar. Gazeta Shqiptare/ a.k
