Një pjesë e autostradës Durrës-Tiranë vijon të qëndrojë e bllokuar për shkak të atentatit që ndodhi pasditen e sotme. Top Channel raporton se policia ka devijuar qarkullimin e automjeteve nga Ura e Dajlanit deri në mbikalimin e Shkozetit, aty ku ndodhi atentati.
Mësohet se policia ka nisur të sekuestrojë të gjithë kamerat e bizneseve që ndodhen përgjatë këtij segmenti të autostradës, për të parë lëvizjet e atentatorëve.
Një sasi e konsiderueshme plumbash u derdhën në drejtim të automjetit me të cilin udhëtonte prokurori Arjan Ndoji. Përveç prokurorit, të plagosur mbetën edhe shoferi Andi Maloku dhe shtetasi Landi Muharremi.
Forcat e Ndërhyrjes së Shpejtë të Tiranës mësohet se janë nisur drejt Durrësit, ndërsa janë marrë masa të larta sigurie në qytet pas atentatit.
Ndërkohë kërkimet e policisë për autorët e atentatit po vijojnë.
Makina, e cila dyshohet se u përdor prej tyre në atentat, u gjet në fshatin Shkafonë afër Gjirit të Lalzit.
Ndëkohë Prokurori i Krimeve të Rënda Anton Martini ka marrë në pyetje rreth orës 21:30 kolegun e tij, Arjan Ndoja, që iu bë atentat pasditen e sotme. Ende nuk dihet se cfarë ka deklaruar, por gjendja e tij është e stabilizuar dhe jashtë rrezikut.
g.kosovari
