Dalin detaje të reja nga krimi i rëndë që goditi qytetin e Durrësit mbrëmjen e kësaj të hëne, ku dy persona mbetën të vrarë.
Policia deklaron se rreth orës 18:55, në lagjen nr. 14, Nishtulla, Durrës, në rrugën afër tregut të perimeve, në rrethana akoma të paqarta kanë humbur jetën Dorjan Shkoza, 35 vjeç dhe Anxhelo Avdija 24 vjeç, dyshohet me armë zjarri.
Shkoza rezulton i dënuar me 8 vjet për drogë dhe ka dalë nga burgu në fund të vitit 2010.
Menjëherë në vendngjarje kanë mbrritur forca të shumta policie, si dhe grupi hetimor. Gjithashtu janë ngritur pika kontrolli dhe është rrethuar zona në një perimetër të gjerë.
Pika kontrolli janë ngritur edhe nga DVP Tiranë e Fier në aksin rrugor Durrës-Tiranë e Durrës-Lushnjë.
Në mbështetje të policisë vendore janë nisur dhe grupe të FNSH-së së Tiranës, për krehjen e zonës.
Paraprakisht dyshohet se është qëlluar nga një automjet në lëvizje. Shërbimet e policisë kanë mundur të identifikojnë targat dhe janë vënë në ndjekje të autorëve.
Sakaq në zonën e Rrogozhinës është gjetur një makinë e djegur, e cila dyshohet se është përdorur nga autorët e krimit.
Për zbardhjen e ngjarjes, në ndihmë të grupit hetimor po shkojnë specialistët e Krimeve të Rënda në Departamentin e Policisë Kriminale.
Grupi hetimor, nën drejtimin e Prokurorisë, po vijon veprimet në vendngjarje, duke grumbulluar dhe fiksuar çdo provë sado të vlefshme që do t’i shërbejë zbardhjes së ngjarjes.
/a.r
