Rreth 20 plumba janë shkrehur në drejtim të makinës së Ferdinand Llanajt dhe Dritan Begës nga autorët e ngjarjes. 39-vjeçari Llanaj ka marrë 10 plumba në pjesë të ndryshme të trupit, por fatmirësisht ai arriti t’i shpëtonte vdekjes.
Ndërsa Dritan Bega ka marrë katër plumba në trup. I dëmtuar mbeti edhe djali i Llanajt, 8 vjeç. Referuar hetimeve të deritanishme për atentatin e ndodhur, Policia ka në listën e pistave të saj, si tri më të mundshmet, ato që kanë lidhje me hasmëritë e familjes Llanaj. Ngjarja e parë ka të bëjë me atë të ndodhur në vitin 2011.
Sako Xhaferri vrau asokohe shtetasin Baftjar Llanaj. Ngjarja ndodhi për motive hakmarrjeje, pasi viktima i kishte vrarë Xhaferrit në vitin 2005 të atin dhe plagosur të vëllanë.
Gjithashtu, Policia ka hedhur dyshime se ky atentat ka lidhje me “masakrën e Çoles”, ngjarje e cila tronditi Vlorën, në vitin 2015. Vëllai i të plagosurit të dy ditëve më parë, shtetasi Aleksandër Llanaj, është dënuar si autor i vrasjes së tre të rinjve, Haki Rakipi, Albi Limaj dhe Ardi Velaj, shkruan panorama
Një tjetër pistë në të cilën është përqendruar policia është atentati i ndodhur më 24 maj të këtij viti, ku mbeti i vrarë pronari i televizionit “Vlora Channel”, Erven Hyseni.
Asokohe, Policia dyshoi për një lidhje të mundshme të ngjarjes me “masakrën e Çoles”, për shkak se ai ishte i afërm i njërit prej të vrarëve, konkretisht të riut Haki Rakipi. Policia bëri të ditur se po heton edhe në disa pista të tjera.
a.ç
