Prokuroria ka pushuar çështjen e atentatit me tritol në farmacinë e babait të Ministrit të Brendshëm Saimir Tahiri.
Mësohet se prokurorët Besnik Muçi Edvin Kondili pushuan çështjen në ngarkim të shtetasit Vladimir Gjuta, i arrestuar nga policia nën dyshimet se organizoi atentatin.
Nga hetimet, prokuroria ka rrëzuar akuzat për vepra terroriste dhe grup kriminal.
Mësohet se për të njëjtat akuza është pushuar çështja edhe në ngarkim të shtetasit Baftjar Bruka, nipit të Vladimir Gjutës.
Gjuta u arrestua në qershor të vitit 2015 në Tunelin e Kalimashit, me një paruke në kokë oër ti shpëtuar ndjekjes policore. Ndërkohë nipi i tij Baftjar Bruka u ekstradua nga Suedia ku u arrestua.
Njoftimi i prokurorisë:
Prokuroria për Krime të Rënda pushon hetimet për disa persona, të dyshuar për veprën penale ”Veprime me qëllime terroriste”
Prokuroria për Krime të Rënda ka vendosur të pushojë procedimin penal ndaj shtetasve Vladimir Gjuta dhe Baftjar Bruka, të dyshuar për veprat penale të “Veprave me qëllime terroriste”, “Krijimit të grupit të strukturuar kriminal” dhe “Kryerjes së veprave penale nga grupi i strukturuar kriminal”, parashikuar nga nenet 230, 333/a dhe 334/1 të Kodit Penal.
Këta shtetas, së bashku me disa të tjerë, për të cilët janë pushuar hetimet më parë, kanë qenë të dyshuar si autorë të vendosjes dhe shpërthimit të tritolit të telekomanduar në biznesin ”Farmaci” të shtetasit B.T, si edhe vendosjen e lëndës plasëse pranë një stacioni autobusi në zonën pranë shkollës ”Vasil Shanto” në Tiranë, ngjarje të ndodhur duke gdhirë data 10.02.2015.
Prokuroria e Krimeve të Rënda ka zhvilluar hetimin ndaj personave të dyshuar, nën masën e sigurisë ”arrest në burg”, pasi, nga materialet paraprake dyshohej se mund të ishin autorët e këtyre ngjarjeve.
Gjatë zhvillimit të hetimeve janë kryer një sërë veprimesh proceduriale, përfshirë edhe ekspertiza të specializuara në bashkëpunim me partnerët ndërkombëtarë, në përfundim të të cilave nuk u provua shkencërisht dhe nuk u siguruan fakte që të provonin përtej çdo dyshimi të arsyeshëm se të arrestuarit ishin organizatorë dhe ekzekutorë të akteve të mësipërme.
Krahas faktit që nuk janë arritur të grumbullohen të dhëna konkrete mbi veprimet e të hetuarve për kryerjen e veprave penale, Prokuroria për Krime të Rënda nuk zbuloi motiv se përse këta shtetas mund të kryenin veprat penale për të cilat dyshoheshin.
Ndërkohë, ndaj të hetuarve Vladimir Gjuta dhe Baftjar Bruka vijon të jetë në fuqi masa e sigurimit ”arrest në burg” vendosur nga Gjykata e Rrethit Gjyqësor Kukës, për vepra të tjera penale, të cilat janë nën hetim nga Prokuroria e Kukësit.
