Presidenti i Palestinës dhe Autoritetit Kombëtar Palestinez, Mahmoud Abbas, ka folur ditën e sotme në Organizatën e Kombeve të Bashkuara.
Sipas mediave të huaja, bëhet e ditur se fjalimi i tij është përqendruar te situata në Gaza dhe kolonët izraelitë në Bregun Perëndimor.
Sot, rreth 700,000 kolonë izraelitë jetojnë në Bregun Perëndimor dhe në Jerusalemin Lindor.
“Qeveria ekstremiste izraelite vazhdon të zbatojë politikat e saj të vendbanimeve… e fundit ishte plani i ndërtimit për E1, i cili do ta ndante Bregun Perëndimor në dy pjesë dhe do ta izolonte Jerusalemin e pushtuar nga rrethinat e tij, si dhe do të minonte opsionin e zgjidhjes me dy shtete, në një shkelje flagrante të së drejtës ndërkombëtare dhe rezolutave përkatëse të Këshillit të Sigurimit”, tha mes të tjerash Abbas.
Ai paralajmëron gjithashtu për “terrorizmin e kolonëve”.
Abbasi shton: “Ata djegin shtëpitë dhe fushat, shkulin pemët dhe sulmojnë fshatrat, si dhe sulmojnë civilë palestinezë të paarmatosur. Në fakt, ata i vranë ata në mes të ditës nën mbrojtjen e ushtrisë izraelite.”
Ai ngre gjithashtu çështjen e sulmeve ndaj vendeve fetare të krishtera.
Referuar luftës së ashpër që po vijon mes Hamasit dhe Izraelit, Mahmoud Abbas u shpreh se Izraeli po kryen gjenocid ndaj popullit palestinez duke i detyruar të zhvendosen nga territori i tyre si dhe duke i lënë të uritur deri në vdekje.
“Izraeli ka vendosur një rrethim mbytës mbi një popull të tërë” dhe ka shkatërruar më shumë se 80% të shtëpive, shkollave, spitaleve, kishave, xhamive, objekteve dhe infrastrukturës. Izraeli nuk është “thjesht një agresion, por një krim lufte dhe një krim kundër njerëzimit që është dokumentuar dhe monitoruar.
Do të regjistrohet në librat e historisë dhe në faqet e ndërgjegjes ndërkombëtare si një nga kapitujt më të tmerrshëm të tragjedisë humanitare në shekujt 20 dhe 21″, tha Abbas.
