“Lidhje direkt nga ATA Hotel në Milano”. Në epokën e internetit këto fjalë nuk kanë magji , por në periudhën pa kompjuter dhe www tërhiqnin gjithmonë vëmendjen e tifozëve shqiptarë që lajmet e merkatos së futbollistëve në Itali i ndiqnin përmes kanaleve televizive të RAI-t apo Mediasetit.
ATA Executive Hotel në Milano ishte selia ku kryheshin bisedimet e merreshin vendimet e ditëve të fundit të “calciomercato-s”, vendi gëlonte nga agjentë, drejtorë sportivë, presidentë, gazetarë e sigurisht edhe tifozë kureshtarë, që mezi prisnin të dëgjonin goditjen e skuadrës së zemrës.
Tani ATA Hotel është bosh dhe i braktisur. Janë hequr tabelat dhe ajo e shkruara historike e bardhë në sfond blu, që ishte simboli i merkatos. Hoteli është mbyllur që nga 16 shkurti, mes protestave të punonjësve.
Tani po kërkohet një seli e re. Hotel Hilton mbetet si pikë takimi midis agjentëve dhe drejtorëve sportivë, megjithatë kërkohet një seli zyrtare për ditët e fundit të calciomercatos.
D. Ikonomi
