Astronautët kinezë kanë përfunduar aktivitetet e tyre jashtë dhe janë kthyer në modulin kryesor të stacionit hapësinor “Tianhe”, njoftoi Agjencia e Fluturimeve Hapësinore me Kozmonautë e Kinës .
Kjo është dalja e dytë jashtë e astronautëve gjatë ndërtimit të stacionit hapësinor të Kinës. Agjencia e Fluturimeve Hapësinore me Kozmonautë e ka shpallur atë një sukses të plotë.
Astronautët Nie Haisheng dhe Liu Boming dolën nga moduli bazë në mëngjesin e së premtes dhe përfunduan të gjitha detyrat e planifikuara pas afërsisht gjashtë orësh. Ata u kthyen në modulin kryesor të stacionit hapësinor në 2:33 të pasdites sipas orës së Pekinit, rreth një orë përpara kohës së përcaktuar.
Astronauti Tang Hongbo qëndroi brenda “Tianhe” duke bashkëpunuar me Nie dhe Liu për kryerjen e operacionit.
Detyrat e planifikuara, duke përfshirë instalimin e pompave të zgjatuara dhe ngritjen e kamerës panoramike, u realizuan me bashkërendim të ngushtë midis hapësirës dhe tokës, si dhe midis astronautëve brenda dhe jashtë anijes.
Tre astronautët u dërguan në hapësirë me anijen kozmike “Shenzhou-12” dhe hynë në “Tianhe” më 17 qershor. Liu Boming dhe Tang Hongbo e kryen daljen e parë jashtë modulit më 4 korrik.
Ekuipazhi i anijes kozmike “Shenzhou-12” do të vazhdojë të kryejë eksperimente lidhur me shkencën e teknologjinë e hapësirës para kthimit të planifikuar në mes të shtatorit.
