Bota e futbollit u trondit nga ndarja e parakohshme nga jeta e ish-kapitenit të Fiorentinës Davide Astori.
Futbollisti vdiq në katër Mars në një hotel në Udine, në pritje të ndeshjes së radhës në kampionatin e Serisë A.
Detaje të reja dalin lidhur me vdekjen e tij që përmbysin raportimet e bëra deri sot. Sipas “Corriere”, Astori nuk ka vdekur në gjumë. Ky është rezultati i dalë nga ekspertiza e kryer nga profesorët Carlo Moreschi dhe Gaetano Thiene.
Raporti tregon se futbollisti befas ka pasur çrregulime të rrahjeve të zemrës derisa ato janë ndalur.
Ai nuk ka qenë në gjumë në ato momente dhe nëse në dhomë do ishte dikush tjetër, sipas mjekëve Astori mund të ishte ende në jetë./a.m.
