Themeluesi i Wikileaks, Julien Assange tha se Shtetet e Bashkuara të Amerikës kishin në plan të rrëzonin nga pushteti Presidentin sirian Bashar al Asad, shumë kohë përpara nisjes së revolucionit kundër tij në vitin 2011. Deklaratën e bëri gjatë një interviste për televizionin rus “Russia Today” nga Ambasada Ekuadoriane ku qëndron i strehuar prej vitesh. Ai prezantoi librin më të fundit “Wikileaks Files”, një përmbledhje analitike e materialeve që përmbajnë dokumenteve të klasifikuara diplomatike të Washingtonit ndër vite. Duke folur për Sirinë, Assange tha se përpjekjet amerikane për rrëzimin e Asad nisin prej vitit 2006.
Ambasadori amerikan në Damask në atë kohë, William Roebuck ka diskutuar me zyrtarët në Washington, disa mënyra për të krijuar panik brenda qeverisë siriane. Duhej të krijohej ideja sikur autoritetet vendase nuk kanë kapacitete për t’i bërë ballë rrezikut të ekstremizmit islamik, që vjen nga shtetet fqinje, kryesisht Iraku. Dhe kjo sipas Assange do t’a ulte qeverinë në bisedime me ekstremistët, çka do të ishte e papranueshme nga ndërkombëtarët.
Një tjetër pistë është nxitja e konfliktit sektar mes sunitëve dhe shiitëve, për t’a çuar vendin në luftë civile. Kjo do arrihej duke përhapur lajmin se shiitët e lidhur me Iranin, po konvertonin me para sunitët e varfër.
Assange shprehet se Shtetet e Bashkuara synonin vendosjen e një qeverie pro-perëndimore në Siri. Për këtë kishin mbështetjen edhe të disa fqinjëve të rajonit, si Arabia Saudite, Katari dhe Turqia, që kanë qëllime hegjemoniste në rajon. Izraelit gjithashtu do t’i shërbente konflikti sirian për të aneksuar lartësitë Golan, të pasura me ujë.
