Askush nuk e di saktësisht se çfarë do të ndodhë me shkallën e infeksioneve të koronavirusit të ri në të gjithë botën, por njoftimi i OBSH se janë regjistruar një milion raste të reja në secilën nga pesë javët e fundit, nuk tregon se situata po shkon drejt fundit.
“Ndërkohë që asnjë vend nuk është i paprekur, kjo rritje e infektimeve po drejtohet në vendet me popullsi të madhe, në Amerikë dhe Azinë e Jugut”, thuhet në njoftimin e OBSH-së.
Brazili dhe India së fundmi kanë raportuar rritjet më të mëdha ditore, ndërsa shifrat mbeten alarmuese në SHBA dhe në Afrikën e Jugut, ku edhe ministri i Tregtisë, Ebrahim Patel, rezultoi pozitiv të shtunën pas testimit.
SHBA është akoma vendi me numrin më të lartë të infeksioneve, me mbi 4,3 milionë të infektuar, nga të cilët 25,856 në 24 orët e fundit dhe 149,602 viktima, ndërkohë që virusi po përhapet në jug dhe në perëndim.
Ndërkohë, lideri koreano-verior, Kim Jong Un, ka thirri politbyronë në një takim urgjent, pasi një person i dyshuar me COVID-19 është kthyer nga Koreja e Jugut, duke kaluar ilegalisht kufirin këtë muaj. Kim ka deklaruar gjendjen e jashtëzakonshme dhe ka izoluar qytetin kufitar Kaesong, duke e cilësuar “një situatë kritike ku virusi mund të ketë hyrë në vend”.
Nëse konfirmohet, ky do të ishte rasti i parë zyrtar i një infektimi me COVID-19 në Korenë e Veriut.
Ndërsa në Vietnam është rivendosur masa e detyrueshme e distancës sociale pas katër rasteve të reja të infektimit në qytetin Danang, ku deri tani nuk kishte asnjë rast në tre muajt e fundit.
Në Indi, Kryeministri Narendra Modi u ka kërkuar qytetarëve që të jenë ekstra vigjilentë nga kërcënimi i COVID-19, pasi vendi regjistroi me më shumë se 48 mijë raste të reja infektimi në 24 orë. India ka në total 1.4 milionë të infektuar dhe më shumë se 30,000 të vdekur nga sëmundja.
Ndërkohë, në Europë turistët vazhdojnë planet me pushimet e tyre, por Mbretëria e Bashkuar ka vendosur karantinë të detyrueshme për të gjithë ata që kthehen nga plazhet e Spanjës.
Situata në Spanjë mbetet shqetësuese, ndërsa autoritete këmbëngulin se çdo gjë është nën kontroll dhe turizmi duhet të vazhdojë, me vendin që do të mbetet i hapur. Sipas Ministrisë spanjolle të Shëndetit, spitalet po e përballojnë mirë rritjen e rasteve të reja, më shumë se gjysma e të cilave janë asimptomatikë, dhe vatrat e mëdha të infeksionit në Katalunja dhe Aragon, së shpejti do të jenë nën kontroll.
Në botë tashmë janë konfirmuar më shumë se 16,3 milionë të infektuar me koronavirus, nga të cilët mbi 650 mijë njerëz kanë humbur jetën.
g.kosovari
