Periudha e festave e ka kaluar provën sa i përket sigurisë ushqimore, pasi nuk është shënuar asnjë rast helmimi nga ushqimi. Sipas raportit të Autoritetit Kombëtar të Ushqimit, inspektorët kanë qenë në terren për të shmangur abuzimet. Ndërsa kontrollet intensive kanë vijuar edhe përgjatë javës së parë të Janarit, ku vihet re se në fokus kanë qenë pikat doganore për të shmangur hyrjen e produkteve që shfaqin problematika që në kufi në mënyrë që të mos shpërndahen tek konsumatorët.
Konkretisht, në pikat doganore, janë zhvilluar 73 inspektime dhe në të gjithë vendin janë kryer 77 analiza. 56% të rasteve ka qenë nga kontrollet zyrtare në Pikat e Inspektimit Kufitar, 28% të rasteve nga kontrollet zyrtare në terren, 17% të rasteve kanë qenë analiza vetëkontrolli. Ndërsa në total gjatë ditëve të para të vitit janë kryer 125 inspektime.
Për bizneset që janë kapur në shkelje të legjislacionit, janë marrë 71 paralajmërime, që në rastet kur nuk marrin masa, ndërhyhet me gjobë dhe bllokim aktivitetit. Gjatë muajit të dhjetor, Autoriteti Kombëtar i Ushqimit me urdhër të veçantë, intensifikoi kontrollet në terren për të garantuar shmangien e abuzimeve në një kohë që rritet ndjeshëm konsumi./SCAN
a.cupaj
