Edhe pse kishte njoftuar një konferencë të rëndësishme për shtyp, kreu i Partisë Demokratike në fakt përsëriti sot kërkesat e tij të artikuluara prej kohësh. Ai kërkoi largimin e Edi Ramës dhe zgjedhje të parakohshme, këtë herë i frymëzuar nga Zoran Zaev.
Lulzim Basha tha sot se Shqipëria ka bërë hapa pas nën qeverisjen e Edi Ramës. Kreu i PD kërkoi vënien para drejtësisë të personave të inkriminuar. Sipas tij, kjo është një kërkesë e panegociueshme e Bashkimit Evropian.
Basha tha në konferencën për mediat se Maqedonia e Veriut nuk ka asnjë kusht, ndryshe nga Shqipëria.
“Kryeministri Zaev megjithatë dha dorëheqjen dhe e çoi vendin në zgjedhje të parakohshme. Nga ana tjetër, qeveria jonë nuk e lëshon pushtetin duke dëmtuar qytetarët. Europa ka refuzuar Edi Ramën dhe jo Shqipërinë” – tha kreu i PD nga selia blu.
Basha u shpreh se shqiptarët po mbahen peng nga një njeri. Sikurse pritej, ai kërkoi që Rama të ndjekë shembullin e Zoran Zaev.
“Neve na duhet një qeveri e dalë nga votat e ndershme. Vetëm ajo mund ta çojë vendin në BE” – tha ai.
/JavaNews/a.r
