Korrupsioni vë në rrezik zbatimin e drejtësisë dhe përbën faktorin kryesor në dështimin e shteteve. Relatori nga Mbretëria e Bashkuar, Richard Benyon foli për disa pika të rëndësishme të projekt-draftit të prezantuar mbi praktikat e korrupsionit që përdoren në botë.
Ai tha se disa vende e përdorin korrupsionin si një mjet qeverisës, ndërkohë që vuri në dukje se sektori ku është më i pranishëm është sektori i energjisë. Benyon shpjegoi se korrupsioni është prezent në vendet e Lindjes së Mesme si dhe cilësoi Rusinë si një vend që nxit këtë problematikë.
Si një mënyrë për të luftuar korrupsionin, ai tha se ‘një nga armët më efikase kundër korrupsionit janë rregulloret”. “Edhe puna e punonjësve të policisë është një mjet i rëndësishëm për ta luftuar. Duhet të rriten pagat e tyre në mënyrë që të kontribuojnë në një shërbim më të mirë. Asambleja e NATO-s duhet të bëjë më shumë në drejtim të shmangies së këtij fenomeni”, shtoi ai.
Gjatë punimeve të këtij paneli, Benyon e lidhi çështjen e korrupsionit me sigurinë. “Kjo është një çështje sigurie dhe ka të bëjë me sigurinë e Europës dhe të ardhmen tonë. Transparenca është mjet për shmangien e korrupsionit”, përfundoi ai. Në vijim të diskutimeve, përfaqësues të shteteve të ndryshme sollën në vëmendje, raste të korrupsionit./a.m.