Pas një lajmërimi që bënë dje në rrjetet sociale këshilltarët e PD-së, një grup artistësh u mblodhën sot para Bashkisë së Tiranës, të gënjyer se në mbledhjen e Këshillit Bashkiak do të diskutohej për pronën e Teatrit Kombëtar.
Por, duket se artistët, të nxitur edhe nga kreu i Sindikatës së Artistëve, Kastriot Çipi, një personazh i afërt me Partinë Demokratike dhe kryetarin e saj, janë përdorur qëllimisht e janë bërë pjesë e kësaj loje, duke qenë se vendimi i miratuar sot në asnjë rresht të tij nuk flet për teatrin. Përkundrazi, ky vendim krijon mundësi për hapësira të reja për banesa sociale për njerëzit në nevojë.
Megjithatë, pasi morën pjesë në mbledhjen e këshillit dhe ndoqën nga afër diskutimet, regjisori Robert Budina dhe kreu i Sindikatës së Artistëve, Kastriot Çipi, u bindën se ishin gënjyer dhe u tërhoqën.
Që e gjitha kjo ishte e orkestruar nga këshilltarët e PD e tregon edhe fakti se deklaratat e artistëve u transmetuan live online nga organi zyrtar i PD, gazeta Rilindja Demokratike.
Vendimi që citojnë artistët, në të vërtetë parashikon që pronat në pronësi të Bashkisë së Tiranës, por që aktualisht janë ngrehina apo objekte të pashfrytëzuara, do të mund të zhvillohen se bashku me ato private kufitare si çdo pronar tjetër që merr pjesë në zhvillim, të cilët në përfundim të projektit, do t’ia kalojnë sërish të njëjtën sipërfaqe prone Bashkisë së Tiranës, por tashmë të zhvilluar dhe të gatshme të përdoret për banesa sociale, biblioteka zyra pune, pika shërbimi për qytetarët etj. Përmes kësaj formule, Bashkia e Tiranës do të marrë mbrapsht të njëjtën sipërfaqe të pronës së mëparshme, para se ajo të zhvillohej, por njëkohësisht do ta shfrytëzojë pronën e saj pa asnjë kosto. /ma.me
