Ministria e Kulturës në kuadër të një bashkëpunimi me Fondacionin “Pistoletto” (Biella, Itali), institucionalizon dhe mundëson për herë të parë të drejtën e pjesëmarrjes së artistëve të rinj shqiptarë në programin residencial ndërkombëtar “Cittadellearte” Torino, Itali, i cili do të zhvillohet në datat 10-21 tetor 2016.
Ky program, vjen nga konkretizimi i Protokollit të Mirëkuptimit mes Ministrisë së Kulturës dhe Bashkisë së Torinos për bashkëpunimin dypalësh në fushat e artit dhe kulturës nënshkruar në datën 11 dhjetor 2015. Ministria e Kulturës, do të ofrojë dy bursa studimi që përfshijnë shpenzimet e plota të qëndrimit dy-javor residencial të artistëve shqiptarë, përfshirë shpenzimet e udhëtimit ndërkombëtar.
Ajo që do të jetë në këtë program, është dhe fakti se ai do të zhvillohet në dy hapësira kulturore në Biella të Italisë dhe në qytetin e Shkodrës në “Art House”. “Artistët që do të përzgjidhen nga një komision profesionistësh në UNIDEE-“Universita delle Idee” të Italisë, nëpërmjet modulesh disa ditore të hapura për artistët, kuratorët dhe studentët ndërkombëtarë që do të banojnë në “Qytetin e Artit”, do të marrin njohuri dhe dije nga partnerë akademikë dhe një sërë artistësh ndërkombëtarë. Programi residencial për periudhën 10-21 tetor 2016 do të zhvillohet në dy hapësira kulturore: “Cittadellearte” në Biella të Italisë, themeluar nga Michelangelo Pistoletto në vitin 1998 dhe Rezidencën “Art House” në qytetin e Shkodrës, Shqipëri, krijuar nga artisti Adrian Paci në vitin 2015”, thuhet në faqen zyrtare të Ministrisë së Kulturës. Konkursi u çel dje dhe data e fundit e aplikimeve është 25 korrik. Periudha e shpalljes së fituesve do të jetë më datë 15 shtator.
Në konkurs kanë të drejtë të marrin pjesë artistë të rinj në fushën e arteve pamore nga mosha 23- 30 vjeç, ndërsa nga ministria janë përcaktuar dhe të tjera kritere për pjesëmarrësit, ku gjithashtu kërkohet që të dorëzohet dhe një letër motivimi. “Përshkruani karakterin e punës suaj si artist, një përshkrim të shkurtër të atmosferës artistike ku bëni pjesë dhe kushtojini rëndësi arsyetimit se përse është e nevojshme kjo rezidencë për ju”, thuhet në materialin e publikuar në faqen zyrtare të Ministrisë së Kulturës. Mes të tjerave ministria bën të ditur se mungesa e një, ose më shumë dokumenteve të kërkuar nuk kualifikon në konkurs./a.m.
