Fushata “Unë zgjedh arsimin profesional” që e realizon Ministria e Punës, ka vijuar gjatë ditës së sotme në qytetin e Shkodës.
Këtij aktiviteti i është bashkuar dhe kryetarja e Bashkisë së Shkodrës Voltana Ademi, përfaqësuese e PD.
Ajo ka kërkuar një marrëveshje të mundshme mes qeverisë dhe bashkisë për shkollat profesionale në qytetin e saj.
“Bizneset duan njerëz të kualifikuar. Biznesi do të punësojë, por jo gjithmonë ka të kualifikuar. Shkodra ka një traditë të mirë të arsimit profesional, unë dua të kërkoj një marrëveshje të mundshme mes qeverise dhe bashkisë për shkollat profesionale. Praktika e nxënësve të shkollave profesionale të bëhet në institucionet lokale, bashkia ua mundëson këtë”, u shpreh Ademi.
Ministri Klosi iu përgjigj se, Shkodra ka një traditë për arsimin profesional ndërsa shtoi se diplomat e arsimit profesional së shpejti do të njihen dhe në tregun europian të punës.
“Jemi në një fushatë për të bërë të qartë se arsimi profesional është e tashme dhe e ardhmja për tregun e punës. Është arsimi profesional që është i pranuar edhe nga tregu europian i punës. Arsimin profesional duam të bëjmë temë të ditës, sepse realisht duam që njerëzit ta kuptojnë se me arsim profesional merr një zanat, të ofron punë, një pagë shumë herë më të mirë, ka gjithashtu mundësi për vijimin e universitetit dhe aftësimin e mëtejshëm. Shkodra ka tradite për arsimin profesional, janë 4 shkolla. Do ti japim shkollës profesionale, emrin e shkollës me te mire ne rajon. Ambasada italiane do te investoje gjysme milion euro për ta modernizuar atë. Diplomat e arsimit profesional shume shpejt do te njihen edhe ne tregun europian të punës. Dyfishimi i diplomave është dyfishim i ekonomisë së vendit. Këto janë mekanizma që i ka provuar bota”, mësohet të ketë thënë Klosi.
