Policia në Holandë ka arrestuar kreun e pretenduar të një prej bandave më të mëdha në botë të drogës, me një urdhër të lëshuar nga Australia.
Tse Chi Lop, shtetas kanadez i lindur në Kinë – thuhet të jetë kreu i Kompanisë, e cila dominon një treg të paligjshëm të drogës prej 70 miliardë dollarësh në Azi.
I listuar si një nga të arratisurit më të kërkuar në botë, Tse u arrestua në aeroportin e Amsterdamit Schiphol.
Australia tani do të kërkojë ekstradimin e tij për t’u përballur me gjyqin atje.
Policia Federale Australiane (AFP) beson se Kompania, e njohur gjithashtu si Sindikata Sam Gor, është përgjegjëse për deri në 70% të të gjitha barnave ilegale që hyjnë në vend.
56-vjeçari është krahasuar me zotin meksikan të drogës Joaquin “El Chapo” Guzman për shkak të shkallës së ndërmarrjes së tij të pretenduar.
Policia australiane thuhet se e ka ndjekur Z. Tse për më shumë se një dekadë para se ai të arrestohej të premten ndërsa ishte gati të merrte një fluturim për në Kanada.
Një deklaratë e policisë, e cila nuk e emëroi Z. Tse, tha se urdhri i arrestit ishte lëshuar në 2019 në listën e Interpolit.
“Ai ishte tashmë në listën e më të kërkuarve dhe u arrestua bazuar në inteligjencën që morëm”, tha një zëdhënës i policisë holandeze.
Reuters publikoi një hetim të veçantë ndaj Z. Tse në 2019 – duke e përshkruar atë si “njeriu më i kërkuar i Azisë”.
Agjencia e lajmeve citoi vlerësimet e KB, duke thënë se të ardhurat e organizatës vetëm nga shitjet e metamfetaminës mund të ishin deri në 17 miliardë dollarë në 2018.
Përpjekja për të arrestuar Z. Tse, Operacioni “Kungur”, përfshiu rreth 20 agjenci nga kontinentet anembanë globit.
g.kosovari
