Policia e Shtetit ka arrestuar ish-drejtorin e Përgjithshëm të Burgjeve Artur Zoto.
Zoto u arrestua me urdhër të prokurorisë ndërkohë bëhet me dije se ndaj tij është vendosur më herët nga gjykata masa e sigurisë “arrest me burg”. Ai dyshohet për korrupsion.
Pak kohë më parë në pranga ranë edhe ish-zëvendësdrejtori i Përgjithshëm i Burgjeve Iljaz Labi si dhe disa biznesmenë. Ata akuzoheshin për abuzime me tenderat për furnizimin me ushqime të burgjeve.
Pas skandalit, Artur Zoto dha dorëheqjen aso kohe por pa dhënë sqarim për motivet. Ai është përfolur pas hetimeve për ish-zëvendësin e tij dhe ishte i dyshuar se gjithçka bëhej me dijeninë e tij.
Njoftimi i policisë:
Më datë 21.02.2017 u bë ekzekutimi i masës së sigurimit personal “Arrest në burg” për shtetasin:
– A. Z., 43 vjeç, banues në Tiranë
Ndalimi i këtij shtetasi u bë pasi ndaj tij, Gjykata e Shkallës së Parë për Krimet e Rënda Tiranë me vendimin e datës 21.02.2017 ka vendosur masën e sigurimit personal “Arrest në burg”, pasi dyshohet se ka konsumuar veprën penale të “Korrupsionit pasiv të funksionarëve të lartë dhe të zgjedhurve vendorë”, pashikuar nga Neni 260 i Kodit Penal.
Materialet i’u kaluan Prokurorisë pranë Gjykatës së Shkallës së Parë Tiranë për veprën penale “Korrupsionit pasiv të funksionarëve të lartë dhe të zgjedhurve vendorë”, parashikuar nga Neni 260 i Kodit Penal.
/a.m.
