Policia e Tiranës ka sekuestruar një makinë të blinduar ndërsa në pranga ka rënë Xhoni Asllanaj 20 vjeç dhe ka proceduar penalisht në gjendje të lirë dy shokët e tij J.Daci 20 vjeç dhe A.Kovaci (Xhabafti) 44 vjeç.
Arrestimi i Asllanaj sipas policisë së Tiranës është bërë pasi në çantën e dorës që ai mbante i është gjetur një pistoletë e markës HS 2000 me 15 fishekë.
Burime për ReportTv nga sektori i krimeve ndaj jetës e personit bënë me dije se gjatë kontrollit këtyre tre shtetasve u janë sekuestruar dhe një sasi e konsiderueshme parash ne vlerën e 10 mijë eurove si dhe dy anti-plumb.
Operacioni për arrestimin e Asllanajt është kryer mbrëmjen e djeshme pasi në një postbllok policie ai si është bindur urdhrit për të ndalur dhe pas një ndjekje që ka zgjatur për disa minuta është bërë i mundur ndalimi i mjetit të blinduar në aksin Unaza Vorë.
Ndërkohë hetimet po kryhen për të ekzaminuar armën e zjarrit pistoletë nëse kjo është përdorur apo jo në ndonjë krim të mëparshëm.
Pas shoqërimit policia ka lënë të lirë dy shokët e Asllanaj të cilët pasi kanë deponuar po hetohen në gjendje të lirë.
Të tre personat e ndaluar në mjetin e blinduar rezultojnë me precedent të mëparshëm penal në fushën e vjedhjes dhe armëmbajtje pa leje.
shqiptarja.com/d.i.
