Dy vëllezër, me veprimtari të gjerë në fushën e krimeve ndaj personit dhe të kultivimit dhe trafikimit të lëndëve narkotike në Shqipëri, u arrestuan nga Policia e Shtetit në kuadër të operacionit të koduar “Selenica”.
Pas këtij operacioni ka reaguar ministri i Brendshëm Sandër Lleshaj.
Në një mesazh në rrjetet sociale ai iu është drejtuar qytetarëve vlonjatë duke u shprehur se sot ata duhet të ndihen më të qetë.
“Policia e Shtetit arrestoi sot në Selenicë një ndër kriminelët më të rrezikshëm në vend, një vrasës të shumëfishtë, të arratisur nga burgu në Itali dhe të dyshuar edhe për vepra të tjera të rënda.
Finalizimi i suksesshëm i këtij operacioni provon qartazi nivelin e integritetit dhe profesionalizmit të Policisë së Shtetit, e cila po e rrit përditë forcën e saj goditëse ndaj krimit.
Por kjo është vetëm NJË goditje e radhës në serinë e pandalshme që vijon.
Vullneti politik për luftën kundër krimit, është i paepur.
Policia e Shtetit është plotësisht e motivuar dhe mbështetja e bashkëpunimi i qytetarëve për të, në funksion të një Shqipërie me të drejtë dhe më të sigurtë, është në rritje të vazhdueshme.
Vlora duhet të ndihet sot edhe më e qetë dhe më e sigurtë, ndërsa Policia e Shtetit më krenare për operacionin e planifikuar dhe finalizuar me mjeshtëri profesionale.
Përgëzime dhe respekt për të gjithë ata pjesëtarë të PSH që kontribuuan në këtë sukses.
Ndërkohë, operacioni vazhdon… “, ka shkruar ai.
g.kosovari
