Deputeti i Partisë Socialiste, Xhemal Qefalia thotë se mazhoranca e mbështet SPAK, por duke zbatuar standardet e duhura, teksa iu referua arrestimit të kryebashkiakut të Tiranës, Erion Veliaj.
Në një intervistë për “Newsline” në ABC News, Qefalia u shpreh se PS është nismëtarja e reformës në drejtësi dhe nuk do të ndërhyjë në këtë reformë.
“PS e ka bërë të qartë, është autorja dhe nismëtarja që ka marrë masa për të pasur një reformë në drejtësi. Kjo mazhorancë, nuk ka dhënë indikacion negativ për ndërhyrje në reformën në drejtësi. Për rastin e zotit Veliajt, ka qenë veprim, që ka sjellë impakt, aty ka pasur artistë, shkrimtarë, intelektualë, kanë qenë prezentë për t’u solidarizuar për punën e kryetarit të bashkisë, në këto vite. Drejtësia duhet të kryejë punën e saj, por duke zbatuar ruajtjen e sjelleve serioze. Atë drejtësi, do e mbështesim, por duhet zbatuar standardet bashkëkohore evropiane. Nuk duam të hyjmë në çështje teknike, por ne kërkojmë të ketë një seriozitet, për të mos cënuar integritetin e asnjë personi. Një drejtësi, e bazuar në standarde, fakte, prova, të bindë individin dhe qytetarët, që gjithkush që nuk ka kryer veprime të kundraligjshme është e barabartë.
Ne nuk do ndërhyjmë aspak në reformën në drejtësi, është garanci, përkundrazi, edhe informacionet se nuk do ketë suport nga SHBA, qeveria shqiptare vazhdon me të njëjtin seriozitet me buxhetin e saj, edhe pse me një buxhet modest, për të pasur një drejtësi realisht të pavarur. Gjithçka duhet të jetë në bazë të provave. Në këndvështrim të përgjithshëm, secili ka dëshirën që kushdo që ka kryer veprime penale, duhet të përgjigjet. Fakti që ende sot nuk kemi fajtor për ngjarjet e 21 janarit, ka neglizhencë në standardizim. Unë besoj ende, bindshëm, që edhe këtu do ketë seriozitet për të hetuar çdo individ që ka kryer veprime të kësaj natyre. Në aspektin humano-njerëzor, kur ke individë që kanë punuar, kjo nuk e ka dekurajuar PS. Madje i mbështesim organet e drejtësisë për ta bërë punën me profesionalizëm”, theksoi ai.
