Ervis Martinaj lëvizte i lirë gjatë kohës kur ishte i shpallur në kërkim ndërkombëtar në kuadër të operacionit “Plumbi i artë” dhe transportuesi i tij duket se ka qenë pikërisht një punonjës policie.
Agjenti i Forcave Operacionale, Jeton Lami u arrestua ditën e sotme nga policia e Shtetit pasi akuzohet se kishte transportuar Martinajn me automjet gjatë kohës që ai ishte i shpallur në kërkim.
Sipas News 24, ka dyshime se Lami kishte ndihmuar të shumë kërkuarin të lëvizte lirshëm pikërisht pas dëshmisë së Nuredin Dumanit i cili në dëshminë e tij implikoi Ervis Martinaj duke i thënë hetuesve se kishte marrë prej tij një porosi me faturë 500 mijë për të ekzekutuar Endrit Doklen.
Megjithatë Dumani tha se nuk e kishte kryer atentatin ndaj Dokles, edhe për shkak të rrethanave duke qenë se Dokle nuk lëvizte asnjëherë pa masa të shtuara sigurie rreth vetes.
Këtë variant e ka konfirmuar edhe Henrik Hoxhaj. Sipas këtij të fundit “çmimi ishte mbi 500.000 Euro pasi sipas Nuredinit personi nga i cili kishte marrë porosinë i kishte thënë kërko sa të duash, para i kishte lënë dorë të lirë tek çmimi”.
Ervis Martinaj pak ditë më parë u denoncua i zhdukur nga familjarët e tij të cilët i thanë policisë se prej ditësh nuk kishin pasur asnjë kontakt me 41-vjeçarin duke theksuar se ishin njoftuar edhe nga një njeri i besuar i tij i cili jetonte jashtë Shqipërisë.
g.kosovari
