Arratisja e sotme e të paraburgosurit Altin Ndoci ka sjellë tronditje në drejtimin e burgut të Durrësit.
Mes tyre edhe drejtori i burgut, Indrit Cerloj, shefi i Policisë dhe zyrtarë të tjerë. Në total janë pezulluar 10 persona duke përfshirë edhe zv/drejtorin dhe mjekun e burgut të Durrësit.
Kjo pas rastit të pazakontë me arratisjen e të burgosurit Altin Ndoci, teksa ai kishte shkuar për t’u mjekuar te spitali i burgut.
Sipas detajeve, Altin Ndoci kishte kryer një vizitë mjekësore ditën e sotme, i shoqëruar nga dy punonjës policie. Nga të dhënat paraprake, Ndoci ka goditur njërin prej policëve dhe ka arritur të largohet, ndërsa sipas informacioneve, një automjet e priste jashtë spitalit.
Ndoci është një personazh i njohur i botës së krimit, i akuzuar për një sërë veprash të rënda penale.
“Paraburgosuri Altin Ndoci është larguar nga ambientet e Spitalit Rajonal të Durrësit, ku ishte shoqëruar për kryerjen e vizitave mjekësore. Të gjitha procedurat mjekësore janë zhvilluar në repartin e infektivit, i cili ka repartin e sigurisë për të dënuarit. Pavarësisht ndërhyrjes së menjëhershme nga forcat e Policisë së Burgjeve për ndalimin e tij, Altin Ndoci ka arritur të largohet nga spitali. Strukturat përkatëse janë vënë menjëherë në lëvizje dhe po punohet intensivisht për lokalizimin dhe kapjen e tij, si dhe për sqarimin e plotë të rrethanave të ngjarjes”, thuhet në një deklaratë paraprake të Drejtorisë së Burgjeve.
