Grupi militant palestinez Hamas pritet të dorëzojë sot tre pengje izraelitë në këmbim të lirimit të një grupi prej 183 të burgosurish palestinezë, në fazën e fundit të marrëveshjes së armëpushimit që synon t’i hapë rrugën fundit të luftës 15-mujore në Gaza.
Ky shkëmbim është i fundit në një seri shkëmbimesh që deri më tani kanë kthyer 13 pengje izraelitë, si dhe 5 punëtorë tajlandezë të rrëmbyer gjatë sulmit të Hamasit dhe 583 të burgosur e të paraburgosur palestinezë.
Frika se marrëveshja mund të zhbëhet para se të gjithë pengjet të lirohen është rritur që nga thirrja e papritur e Presidentit të SHBA-së, Donald Trump që palestinezët të zhvendoseshin nga Gaza dhe që enklava t’i dorëzohej Shteteve të Bashkuara dhe të zhvillohet në “Rivierën e Lindjes së Mesme”.
Negociatat për një fazë të dytë armëpushimi filluan këtë javë. Me këtë synohet kthimi i pengjeve të mbetura dhe tërheqja e plotë e trupave izraelite nga Gaza në përgatitje për një fund të plotë të luftës.
