Rreth 40 arkivole kanë mbetur të varur në ajër pas shembjes së ndërtesës katër katshe e cila shërbente si varrezë murale në Napoli të Italisë. Në të ndodheshin varret më të vjetra murale.
Sipas informacioneve, ky është incidenti i dytë në këtë vit dhe për këtë po fajësohet menaxhimi i dobët i varrezave murale në qytetin jugor të Italisë. Gjithashtu një ngjarje e ngjashme ka ndodhur edhe në Shkurt të vitit të kaluar ku 200 arkivole ranë në det pranë qytetit bregdetar të Ligurisë, pasi një varrezë murale u shemb nga një rrëshqitje dheu, e cila shkatërroi edhe dy kisha.
Pas ngjarjes autoritet mbyllën varrezat e Poggioreale, më e madhja në Napoli, ndërkohë që nisi edhe një hetim për shembjen e ndërtesës së mermerit e quajtur Ringjallja. Për fat të mirë, pasditen e të hënës kur u shemb varreza, nuk kishte asnjë vizitor, për shkak se ajo kishte qenë e mbyllur.
“Shembja u shoqërua me zhurmë dhe me nje re të dendur pluhuri. Ne si administratë po kujdesemi për të gjitha formalitet e nevojshme”, u shpreh Vicenzo Santagada, këshilltar i Napolit, përgjegjës për varrezat murale.
Ndërkohë familjarët e të ndjerëve dolën në protestë të martën.
“Kjo është një situatë kritike dhe e papranueshme. Për shumë vite varrezat në Napoli janë menaxhuar keq dhe janë lënë “në mëshirë të fatit”. Ato janë bërë pre e mashtruesve dhe përfituesve”, ka shkruar në një postim në “Facebook” Francesco Emilio Borelli, këshilltar rajonal për partinë Europa Verde.
/a.r
