Ndeshja Boca Juniors-Racing, e vlefshme për Trofeun e Kampionëve në Argjentinë, përfundoi me plot 10 kartonë të kuq të akorduar nga arbitri.
Facundo Tello ndëshkoi me të kuq nga një futbollist për secilin ekip në minutën e 90, kur rezultati ishte 1-1. Por, askush nuk e priste rrebeshin e kartonëve që do të vinte në 30 minutat e shtesës.
Kulmi arriti kur Carlos Alcaraz i Racing shënoi golin e fitores në minutat e fundit të shtesës dhe festimi i tij tërboi lojtarët e Boca, të cilët shkuan dikush për ta shtyrë, dikush për t’i shkulur veshin e dikush tjetër për ta goditur me top.
Pasi sherri përfundoi, arbitri i tregoi kartonin e kuq 5 lojtarëve të Boca dhe 2 të Racing, përfshi golashënuesin. Gjithashtu, ndëshkoi me të kuq edhe një zyrtar të Boca Juniors.
Pas këtij takimi, arbitri Facundo Tello do të udhëtojë në Katar për Botërorin. Ai është arbitër ndërkombëtar që nga viti 2019 dhe konsiderohet si arbitri më i mirë i Argjentinës.
/a.r
