“Pesëmbëdhjetë vjet më parë, mafia ballkanike gjeti një ‘degë’ në Ekuador për operacionet e trafikut të kokainës nga Amerika e Jugut në Evropë. Kjo organizatë kriminale kishte mbërritur në Kolumbi dhjetë vjet më parë, por lideri kriminal me bazë në vendin e kafesë, serbi Darko Sariç, nuk arriti atë që ‘misionari’ i dërguar në Ekuador arriti në një vit: u bë trafikanti më i madh i drogës në Ballkan.”
Kështu e hap reportazhin media ekuadoriane “Expreso”. Dhe misionari për të cilin ajo shkruan dhe që u bë trafikanti më i madh i drogës në Ballkan, është shqiptari Arbër Çekaj.
“Ky është shqiptari Arbër Cekaj, të cilit në vitin 2008 iu deshën vetëm disa muaj për të krijuar imazhin e një biznesmeni eksportues bananeje dhe për të arritur marrëveshje me ferma të ndryshme, legalisht, që t’i shisnin produktin dhe ta dërgonin në kontejnerë në kontinentin e vjetër. Për shtatë vjet, i huaji operoi pa asnjë problem dhe as nuk u hetua, as nuk figuronte në ndonjë listë të dyshuarish”, vijon artikulli.
“Nuk dihet se sa alkaloid ka arritur të transportojë, por dihet se sa ka pasur qëllim të trafikonte në ngarkesën e fundit: 32 blloqe, të shpërndara në katër kuti bananesh. Me vlerat e referencës llogaritet se ky mall i paligjshëm i kalonte 2 milionë dollarët”, thotë shkrimi.
“Në procesverbalet gjyqësore, detajohet se pak pas mesditës së 4 prillit 2015, shqiptari ka mbërritur në vendngjarje për të mbyllur blerjen e më shumë se një mijë kutive me banane, të cilat janë ngarkuar në një kontejner në prani të tij.
Ai kishte mbërritur me një Hyundai Tucson gri, në shoqërinë e një gruaje të re, Sara. Aty ishin edhe pronari i plantacionit të bananeve dhe përgjegjësi i kontrollit të cilësisë. Ata me sa duket nuk e vunë re kurrë kur Cekaj ??shkarkoi katër kartona nga makina e tij dhe u kërkoi portierëve që t’i vendosnin edhe ato në kontjner, para se ta mbyllnin.
Kjo situatë në dukje e çuditshme do të kishte tërhequr vëmendjen e një punëtori tjetër, i cili donte të dinte se çfarë kishte në kuti dhe kështu ai e kapi njërën dhe e fshehu për ta kontrolluar më vonë.
Më pas, rreth orës 14:00, kur ngarkesa ishte larguar, me kujdestarinë e shqiptarit në drejtim të një porti detar në Guayaquil, punëtori që stivonte kutitë hapi kartonin dhe zbuloi pakot e drogës. Ai e raportoi situatën tek punëdhënësi i tij dhe ai nga ana e tij në Polici.
Kështu, në kryqëzimin e njohur si T de Yaguachi, drejtuesit të rimorkios iu kërkua të ndalonte. Madje ka pasur një diskutim mes Cekajt dhe përgjegjësit për cilësinë e frutave, pasi ky i fundit dyshohet se kishte banane të pjekura, pa e ditur se çfarë ishte pjesa tjetër e përmbajtjes.
Më pas mbërriti Policia dhe me sa duket krimineli ballkanik nuk ishte më aty dhe deri në mbylljen e këtij edicioni, afro tetë vjet më vonë, ai nuk ishte gjetur më.”/m.j
