Komisioni i Ekonomisë bëri bashkë socialistët dhe demokratët për të votuar projektligjin e deputetit Erion Braçe, për të ndryshuar skemën e TVSH-së në bujqësi. Socialisti Braçe kërkon shfuqizimin e skemës së vitit 2018, të propozuar nga ish ministri në arrati Arben Ahmetaj, për shkak se ka dëmtuar sektorin e bujqësisë, blegtorisë, pyjeve e peshkimit. Aktualisht sot një grumbullues kur blen produktin tek fermeri rimbursimin e TVSH-së e ka 0për qind, ndërsa kur e blen në import rimbursohen 20 për qind.
“Aplikohet me 0për qind TVSH në blerje nga bujku apo blegtori, dhe detyrohet të shesë me 20për qind, praktikisht nuk keni më tatim mbi vlerën e shtuar por tatim mbi qarkullimin. Kjo ka sjellë pasojë shumë të rënë në prodhimin vendas, ka favorizuar importin dhe produktet që vijnë nga importi dhe do vendosim barazi në prodhimin vendas. Do të aplikohet përmes një autofature dhe kur të llogaritet TVSH-ja do të bëhet siç ndodh në gjithë tregun, TVSH në shitje minus TVSH në blerje dhe mbetet TVSH-ja e pagueshme. Kjo nismë sjellë formalizim, pasi sot që flasim nuk ka asnjë faturë”, u shpreh Braçe.
Nisma është mbështetur nga të gjithë deputetët në komision.
“Politika e ndjekur prej 2018-ës ka sjellë ulje të numrit të bagëtive, dhe të prodhimit blegtoral, dhe njëkohësisht ka shtuar emigracionin e bujqve e blegtorëve. Kjo skemë ka fuqizuar importin për të gjitha produktet”, deklaroi deputetja e PD-së Emilia Koliqi.
“Kjo skemë do të sjellë konkurrencë të ndershmi dhe ulje të çmimeve për konsumatorët shqiptare”, u shpreh Alban Xhelili, deputet i PS.
Edhe Ministria e Bujqësisë dhe Zhvillimit Rural është gati të ngrihet grupi i punës për ta parë skemën dhe për ta ndryshuar.
“Ministria e Bujqësisë është në parim dakord për çdo nismë që ndikon pozitivisht tek fermerët tanë. Edhe në 2018 kemi qenë që kjo TVSH të mos ndryshojë, dhe jemi gati që me MF, të bashkëpunojë dhe ta ndihmojmë Ministrinë e Financave ta ndryshojë këtë Tatim. Do të ulemi në grupet teknike për të përgatitur aktet nënligjore”, theksoi zëvendësministri i MBZHR, Arian Jaupllari.
Edhe pse Komisioni i Ekonomisë u shpreh pro nismës duhet edhe opinioni i Ministrisë së Financave për këtë projektligji.
