Ministrat e Bashkimit Evropian kanë miratuar të martën dhënien e statusit kandidat për Bosnjë dhe Hercegovinën.
Vendimi duhet të konfirmohet tashmë nga 27 liderët e bllokut, të cilët do të mblidhen në Bruksel për një samit të enjten.
“Kjo dërgon një sinjal të fortë për rajonin e Ballkanit Perëndimor dhe mbi të gjitha, për qytetarët e Bosnje dhe Hercegovinës”, shkroi në Twitter ministrja austriake e BE-së, Karoline Edtstadler.
Statusi i kandidatit është një përcaktim kryesisht simbolik që pranon se vendi është në rrugën e duhur për të filluar procesin e gjatë dhe kompleks të anëtarësimit. Më konkretisht, marrja e statusit të vendit kandidat nuk nënkupton automatikisht fillimin e negociatave.
Por gjithsesi, ky hap përfaqëson një nxitje për vendin e vogël me 3.5 milionë banorë, i cili aplikoi për t’u anëtarësuar në vitin 2016 dhe oferta e tij u miratua nga Komisioni Evropian në 2019.
/a.r
