Në prag të zgjedhjeve parlamentare të 11 majit, ish-presidenti Alfred Moisiu tha se partitë politike duhet të mendojnë më shumë për një Shqipëri më të mirë, ku do të rriten fëmijët në të ardhmen.
Këtë mesazh, ish-presidenti e dha gjatë ceremonisë së organizuar nga Federata e Paqes Universale në Shqipëri, ku salla e konferencave nga sot do të mbajë emrin e ish-presidentit.
“Mesazhi im është ai që ka qenë gjithmonë. Të mendojmë për Shqipërinë. Të mendojmë për të ardhmen e vendit tonë. Të mendojmë për ardhmërinë e rinisë, që ta bëjmë atë sa më të bukur, sa më të pasur dhe sa më të zhvilluar. Dhe të mendojmë më pak për karrigen, aq më tepër që gjithë këto vite i është më shumë përparësi interesit personal,” u shpreh ish-kreu i shtetit.
Ky vlerësim për ish-presidentin Moisiu erdhi në saje të kontributit të tij shumëvjeçar si kryetar i Këshillit të Lartë të Paqes për Ballkanin.
“Fondacioni është një kënaqësi e madhe për mua, sepse vërtet kam kohë që punoj me të, por duhet thënë që është bërë një punë shumë e madhe. Tre janë destinacionet kryesore të Federatës: të punësojë familjet shqiptare, t’ju vijmë në ndihmë njerëzve të pamundur dhe e treta, të ruajmë paqen në rajon,” tha z. Moisiu.
Të pranishëm në këtë ceremoni ishin personalitete të larta nga Shqipëria dhe më gjerë.
