Gjykata e Apelit Durrës ka refuzuar të pezullojë nga detyra tre gjyqtarë të akuzuar për korrupsion, duke rrëzuar kërkesën e Prokurorisë së Krimeve të Rënda. Gjykata e Apelit nuk e ka pranuar kërkesën e Krimeve të Rënda për të pezulluar gjyqtarët Kliton Spahiu, Petraq Dhimitri dhe Petrit Çeno.
Këta gjyqtarë akuzohen për korrupsion, pasi kanë shkuar në Spanjë dhe kanë parë ndeshjen Barcelona-Real Madrid, ku pagesa e fjetjes në hotel iu është mbuluar nga një person që kishin nën hetim.
Është vërtetuar nëpërmjet letër-porosisë se hoteli është paguar nga karta e kreditit të një personi që gjyqtarët e kishin në proces gjykimi. Bëhet fjalë për një proces civil dhe tre gjyqtarët kanë marrë vendim pro personit që ka paguar hotelin me kartë krediti.
Tre gjyqtarët ishin në hetim për korrupsion pasiv nga Prokuroria e Krimeve të Rënda prej vitit 2014, kur ata udhëtuan drejt Spanjës për të parë nga afër ‘El Classico’, por që përfituan nga personi që kishin në proces gjyqësor. Sot, Apeli i Durrësit ka dalë kundër Krimeve të Rënda për të pezulluar gjyqtarët, duke i marrë ata në mbrojtje. /Shqiptarja.com
