Pas dënimit të ish deputetit Mark Frroku me akuzat e mosdeklarimit të pasurisë dhe pastrimit të produkteve të veprës penale, prokurorisë i lind e drejta ligjore për të kërkuar konfiskimin e pasurive të këtij shtetasi, shkruan “Panorama”.
Kërkesa për konfiskimin e pasurive të Mark Frrokut është në proces duke u trajtuar nga ana e Krimeve të Rënda.
Ndërkohë në shtator 2016, me kërkesë të Prokurorisë për Krime të Rënda, gjykata ka vendosur sekuestrimin e 7 apartamenteve, 2 garazheve, 2 dyqaneve dhe një sipërfaqe tokë arë, në emër të ish-deputetit Mark Frroku, në vijim të hetimit pasuror të nisur ndaj tij.
Sipas prokurorisë, i pandehuri Frroku aktualisht është në gjykim për veprat penale të “Vrasjes me paramendim”, “Fshehjes së pasurisë…”, “Pastrimit të produkteve të veprës penale” dhe “Ndërtimit të paligjshëm”.
I pandehuri Frroku u gjykua në Shqipëri për akuzat se, në bashkëpunim, ka vrarë një shtetas shqiptar në Belgjikë, në vitin 1999.
Sipas hetimit të autoriteteve belge, të cilat përcollën aktet pranë Prokurorisë së Përgjithshme të Shqipërisë, Frroku dhe disa bashkëpunëtorë të tjerë kanë vrarë një bashkëkombësin e tyre, pas konflikteve për trafikun e prostitucionit. Për këtë akuzë, Frroku mori pafajësi nga gjykata.
Po ashtu, sic pretendoi prokuroria, i pandehuri rezulton gjithashtu se është i dënuar nga Gjykata e Amsterdamit me 3 vjet burgim në vitin 2002, si i përshirë në veprimtarinë e paligjshme të trafikimit të lëndëve narkotike, duke përdorur emrin Piro Sofrani.
Nisur nga këto të dhëna, Prokuroria për Krime të Rënda nisi hetimin pasuror ndaj të pandehurit Frroku. Në vijim të këtij hetimi, ka rezultuar se Mark Frroku, në cilësinë e deputetit të Kuvendit të Shqipërisë, ka deklaruar pasurinë.
Nga ekspertiza kontabël ka rezultuar se i pandehuri Frroku nuk justifikonte me burime të ligjshme një pjesë të konsiderueshme të pasurisë së tij.
Nisur nga e shkuara e tij kriminale, Prokuroria për Krime të Rënda ka krijuar dyshime të arsyeshme se një pjesë e pasurisë së tij është krijuar nga burime të paligjshme, kryesisht nga veprimtaria kriminale në fushën e narkotrafikut dhe të prostitucionit.
Për këto arsye, Prokuroria për Krime të Rënda evidentoi asetet e paluajtshme në emër të tij dhe kërkoi sekuestrimin e tyre. Kërkesa e Prokurorisë u pranua nga Gjykata për Krime të Rënda, e cila urdhëroi sekuestrimin e pasurive, si vijon:
Apartamente
- Apartament me sipërfaqe 56.84 m2 në Orikum
- Apartament me sipërfaqe 78.66 m2 në Orikum
- Apartament me sipërfaqe 69.6 m2 në Shëngjin, Lezhë
- Apartament me sipërfaqe 49.3 m2 në Shëngjin, Lezhë
- Apartament me sipërfaqe 55.2 m2 në Shëngjin, Lezhë
- Apartament me sipërfaqe 100 m2 në Kashar, Tiranë
- Apartament me sipërfaqe 100 m2 në Kashar, Tiranë
Dyqane
- Dyqan me sipërfaqe 133 m2 në Tiranë
- Dyqan me sipërfaqe 175 m2 në Tiranë
Garazhe (bodrume)
- Bodrum 11.6 m2 në Shëngjin, Lezhë
- Bodrum 11.6 m2 në Shëngjin, Lezhë
Tokë arë
- Tokë arë me sipërfaqe 6000 m2, në “Grykë Lumi”, Lezhë.
