Avokati i Popullit, Igli Totozani, po ndjek me vëmendje të veçantë situatën e krijuar me migrantët në territorin e shtetit grek, në vijim edhe të qëndrimit të mbajtur nga Kombet e Bashkuara përmes deklaratës së bërë nga Zeid Ra’ad Al Hussein ,Komisioneri i Lartë i të Drejtave të Njeriut në OKB.
Avokati i Popullit i bën thirrje autoriteteve shqiptare që të përgatiten dhe të marrin të gjitha masat për respektimin dhe garantimin, sipas standardeve europiane dhe ndërkombëtare të të Drejtave të Njeriut, të Drejtave të Refugjatëve dhe të Drejtave të Migrantëve, e në mënyrë të veçantë për kategoritë e riskuara si, Personat me Aftësi të Kufizuar, LGBT, gratë, fëmijët dhe moshuarit, nëse rruga e tyre drejt vendeve të BE-së, do të vijojë përmes Shqipërisë.
Avokati i Popullit Igli Totozani, thekson se edhe Policia e Shtetit duhet të realizojë rolin e saj si mbrojtëse dhe garantuese e sigurisë dhe të drejtave të njeriut, në rastin e një fluksi migrator përmes Shqipërisë. Në këtë kontekst, strukturave të Policisë së Shtetit i lind përgjegjësia që të pengojnë dhe godasin çdo tentativë për trafikim të qenieve njerëzore.
Gjithashtu, është e domosdoshme që Qeveria Shqiptare të shtoj përpjekjet e saj informuese dhe promovuese për të mos lejuar shfaqjen e stereotipeve, tabuve, akteve diskriminuese, raciste e ksenofobiste.
“Ky është një nga ato momente, ku shoqëritë dhe individët vihen në provë për ndjenjat e tyre të solidaritetit dhe humanzimit”, shprehet z. Totozani, duke vlerësuar se “Shqipëria është një shoqëri e civilizuar dhe demokratike, e hapur për të ndihmuar njerëzit që i largohen vuajtjeve”.