Të gjithë punonjësit e Policisë së Shtetit do të jenë përgjegjës në rast se ndonjë familjar i tyre kultivon kanabis, apo edhe nuk e denoncon një rast kultivimi kur e konstaton diku tjetër. Të njëjtën përgjegjësi do të mbajnë edhe policët privatë. Për këtë arsye, ata kanë kohë deri më datë 15 prill që të dorëzojnë pranë drejtorive, komisariateve dhe stacioneve policore deklaratën individuale dhe me emrat e familjarëve, me përgjegjësitë që mbajnë.
Ata duhet të firmosin që nuk do të kultivojnë vetë, familjarët e tyre dhe që do të denoncojnë çdo rast kultivimi kanabisi. Ky është një udhëzim i drejtorit të Përgjithshëm të Policisë së Shtetit, Haki Çako, që vjen në mbështetje të planit kombëtar antikanabis. Çako paralajmëron se do të ketë masa të rrepta në rast se nuk respektohen ato që vetë policët do të deklarojnë në formularët që do të dorë- zojnë në polici.
Në udhëzim përshkruhet se punonjësi i policisë mban përgjegjësi edhe për familjarët e tij, babanë, nënën, vëllezërit, motrat, bashkëshorten apo bashkëshortin dhe fëmijët. Të njëjtën përgjegjësi do të mbajnë edhe efektivët e policive private.
UDHEZIMI
Drejtori i Policisë së Shtetit, Haki Çako, ka ndërmarrë një sërë masash të forta për punonjësit e Policisë në lidhje me parandalimin e kultivimit të kanabisit. Këto masa do të përfshijnë edhe punonjësit e policive private.
Çako ka kërkuar nga punonjësit e Policisë së Shtetit dhe të policive private vetëdeklarim nga secili. Punonjësit e Policisë së Shtetit dhe ata të policive private duhet të vetëdeklarojnë se nuk do të kultivojnë kanabis. Deklarimet e firmosura prej tyre do të dorëzohen brenda datës 15 prill pranë çdo strukture policie.
Policët privatë do t’i dorë- zojnë ato në komisariatet e Policisë që mbulon territorin ku banojnë. Punonjësit e Policisë së Shtetit dhe të policive private duhet të sigurojnë me anë të vetëdeklarimit se as familja nuk do të merret me kanabis. Duhet të deklarojnë dhe të sigurojnë se as rrethi familjar nuk do të kultivojë kanabis. Sipas udhëzimit të Çakos, masat më të ashpra do të merren për policët që do të kultivojnë kanabis.
Por edhe për ata që do të neglizhojnë në përmbushjen e këtij prioriteti kombëtar.
“Masa shumë të ashpra edhe për ata punonjës policie që do t’u gjendet kanabis i kultivuar në territorin që mbulojnë. Masa ligjore edhe ndaj të zgjedhurve vendorë e kryetarëve të fshatrave. Gjithashtu, edhe ndaj policëve pyjorë, në rast se në sipërfaqet pyjore konstatohet kultivim kanabisi dhe ata s’kanë raportuar”, shprehet Çako në udhëzimin e tij.
Po ashtu, përgjegjësi penale do të kenë edhe ata që kanë dijeni, por nuk denoncojnë pranë strukturave kultivimin e kanabisit.
ma.me
