Anglishtja do të jetë provim i detyruar edhe në arsimin 9-vjeçar. Kjo do të thotë që në provimet kombëtare të përfundimit të klasës së nëntë nxënësit do të testohen edhe për anglishten.

Në nenin 72 të ligjit të ri për arsimin parauniversitar, pika 4 shprehet qartë se provimi i gjuhës së huaj i arsimit bazë i shtrin efektet e zbatimit në vitin 2015.

Skema e vlerësimit do të jetë një standard vlerësues i njëjtë për çdo nxënës. Bashkë me testet për çdo provim, AKP-ja i dërgon Komisionit të Provimeve të Lirimit pranë drejtorive arsimore ose zyrave arsimore skemën e vlerësimit të testit dhe atë të konvertimit të pikëve në nota. Pas çdo provimi, dërgohet skema e vlerësimit në Komisionin Shkollor të Provimeve të Lirimit, e cila afishohet dhe informon çdo nxënës për të.

Ndërkohë që korrigjimi i testeve do të realizohet në mjediset që përzgjidhen nga DAR/ZA, në kushte të përshtatshme dhe të sigurta. Çdo test do të vlerësohet nga dy vlerësues dhe çdo vlerësues firmos në çdo test që korrigjon. Kur midis dy vlerësuesve ka ndryshime pikësh për të njëjtat kërkesa, kryetari i vlerësuesve të lëndës cakton një vlerësues të tretë, vendimi i të cilit është përfundimtar.

ATSH