Mbretëria e Bashkuar nuk po bashkëpunon mjaftueshëm me Francën për të reduktuar numrin e emigrantëve që kalojnë Kanalin Anglez me varka të vogla, sipas një raporti francez.
Franca “po lufton për të zhvilluar marrëveshje bashkëpunimi operacinal” me Mbretrinë e Bashkuar, sipas raportit të publikuar të enjten nga Gjykata e Llogarive e Francës, një organ përgjegjës për auditimin e përdorimit të fondeve publike, i pavarur nga qeveria dhe parlamenti.
Raporti i referohet veçanërisht një njësie të përbashkët inteligjence të krijuar në vitin 2020 për të luftuar kontrabandën e qenieve njerëzore dhe për të zvogëluar numrin e njerëzve që rrezikojnë jetën e tyre për të kaluar ilegalisht Kanalin. Në vitin 2022, ai ndihmoi në çmontimin e shtatë rrjeteve të migrimit të paligjshëm.
Gjykata thotë se “britanikët nuk japin iformacion të përdorshëm për nisjet e varkave të vogla dhe japin informacion shumë të përgjithshëm”.
Informacioni mbi rrethanat në të cilat mbërrijnë emigrantët dhe kombësitë e tyre “janë shumë të paqarta,” thuhet në raport.
“Marrëdhënia midis Francës dhe Mbretërisë së Bashkuar është e pabalancuar për sa i përket shkëmbimit të informacionit dhe inteligjencës.”
Ministria e Mbrojtjes e Mbretërisë së Bashkuar vlerësoi se kalimet në Kanalin Anglez u rritën me të paktën 58% midis 2021 dhe 2022, një vit që pa mbi 45,000 emigrantë të arrestuar në brigjet britanike.
Raporti tha se 56% e tentativave të kalimit u parandaluan po atë vit.
Franca vitet e fundit ka rritur përpjekjet për të parandaluar emigrantët të kalojnë Kanalin, duke shtuar numrin e policëve.
Vendi mori 222 milionë euro (243 milionë dollarë) nga Britania e Madhe nga viti 2018 në 2022 si pjesë e një marrëveshjeje dypalëshe dhe kryeministri britanik Rishi Sunak marsin e kaluar premtoi 541 milionë euro për periudhën 2023-2026.
Numri i njerëzve që jetojnë ilegalisht në Francë nuk dihet, por studiuesit nga Qendra Kërkimore Pew vlerësuan se numri i tyre në vitin 2017 ishte midis 300,000 dhe 400,000, në një vend me 67 milionë banorë.
Raporti i Gjykatës së Llogarisë vlerësoi një sërë çështjesh të tjera që lidhen me politikat e imigracionit të paligjshëm , të cilat iu nënshtruan 133 ndryshimeve në ligj në dekadën e fundit.
Ai vuri në dukje vështirësinë e zbatimit të urdhrave për t’u larguar nga territori kombëtar, pavarësisht se Franca ka kryer shumicën e dëbimeve në Bashkimin Evropian. Mbi 150,000 vendime të tilla u morën në vitin 2022 dhe vetëm 10% e njerëzve të interesuar u larguan, tha ai.
Autoritetet e Mbretërisë së Bashkuar kthyen rreth 3,500 njerëz në vendin e tyre dhe Gjermania dërgoi rreth 13,000 njerëz në vitin 2022, sipas statistikave të mbledhura nga Ministria e Brendshme franceze.
Arsyet e renditura në raport përfshijnë vështirësinë e autoriteteve franceze për të provuar identitetin e migrantëve në fjalë, hezitimin nga vendet e origjinës për të lëshuar autorizim për t’i lejuar ata të hyjnë dhe refuzimin nga linjat ajrore komerciale dhe pilotët e avionëve për t’i marrë në bord.
Gjykata e Llogarive në vend të kësaj sugjeroi miratimin e politikave që do të inkurajonin migrantët të kthehen vullnetarisht në vendet e tyre të origjinës duke u ofruar atyre para.
Politika të tilla janë vërtetuar se kanë “efikasitet të konsiderueshëm”, tha Gjykata, duke vënë në dukje se Franca ka mbetur prapa Mbretërisë së Bashkuar dhe Gjermanisë në këtë drejtim.
Pierre Moscovici, kreu i Gjykatës së Llogarive, tha të enjten se organi rekomandon gjithashtu një organizim më të mirë të rojeve kufitare dhe policisë për t’i bërë ato më efikase, duke vënë në dukje se më shumë njerëz po kalojnë ilegalisht kufirin, kryesisht nga Italia dhe Spanja, vitet e fundit.
Imigrimi i parregullt i kushton Francës rreth 1.8 miliardë euro çdo vit dhe përfshin 16,000 punonjës shtetërorë, policë dhe ushtarakë, tha Gjykata.
/a.r
