Këshilli Evropian ka konfirmuar se do të heqë kontrollet kufitare tokësore me Bullgarinë dhe Rumaninë muajin e ardhshëm, duke i bërë të dy vendet anëtarë të plotë të zonës së lirë të udhëtimit Shengen të bllokut. Pranimi i tyre në zonë, i vonuar nga shqetësimet për imigracionin e paligjshëm, do të vijë 18 vjet pasi Sofja dhe Bukureshti u bashkuan me BE.
Kontrollet kufitare tokësore midis vendeve dhe shteteve të tjera të Shengenit, midis Bullgarisë dhe Greqisë, respektivisht Rumanisë dhe Hungarisë, do të hiqen që nga 1 janari, tha Këshilli Evropian në një deklaratë të enjten, duke vlerësuar “momentin historik”.
“Ky hap do të përfitojë jo vetëm qytetarët bullgarë dhe rumunë, por edhe BE-në në tërësi”, tha presidenca hungareze e bllokut.
Kryeministri i Rumanisë Marcel Ciolacu ka deklaruar se “anëtarësimi në Shengen ka qenë një objektiv strategjik për vendin tonë” dhe se Bukureshti do të “vazhdojë të veprojë me përgjegjësi për të mbrojtur dhe forcuar kufijtë e jashtëm të BE-së” për të menaxhuar migracionin e paligjshëm.
Të dy vendet, të dyja anëtare të NATO-s, iu bashkuan BE-së në vitin 2007, por pranimi i tyre në zonën Shengen u shty në pritje të zgjidhjes së disa çështjeve, përfshirë korrupsionin. Procesi u pezullua në mes të krizës evropiane të refugjatëve në 2015.
Austria bllokoi përpjekjet bullgare dhe rumune për t’u bashkuar me zonën Shengen në vitin 2022, me argumentin se shumë refugjatë po arrinin tashmë në vend nëpërmjet rrugës së Ballkanit Perëndimor.
