Bashkimi Evropian ka prezantuar strategjinë e zgjerimit të unionit me vendet e Ballkanit.
Publikisht nga zyrtarët e lartë të BE është deklaruar se Serbia dhe Mali i Zi, mund të anëtarësohen të parat, deri në vitin 2025. Kjo ka ngjallur pakënaqësi jo vetëm tek politikanët shqiptarë, por edhe ata të huaj, si Hanes Svoboda dhe Knut Fleckenstein, që kanë kërkuar të mos lihet prapa as Shqipëria.
Por media prestigjioze “Financial Times” ka befasuar me një analizë të sajën ku jep disa argumenta pse Shqipëria mund të parakalojë Serbinë.
“Premtimi i BE për anëtarësimin ka qenë një incentivë thelbësore për qeveritë që të ndërmarrin vendime të rëndësishme. Por rruga është e gjatë dhe ndikimi i BE-së po ulet. Vetëm 26 përqind e serbëve tani mendojnë se anëtarësimi në BE do ishte diçka e mirë”, thuhet në shkrim.
“BE ka bërë mirë që ka theksuar se progresi drejt anëtarësimit do vlerësohet në mënyrë objektive dhe se çdo shtet mund të parakalojë kryesuesit aktualë (Serbinë dhe Malin e Zi.
Kjo njeh përpjekjet e fundit të bëra nga vende të tilla si Shqipëria dhe u përgjigjet dyshimeve për favorizim të Serbisë në veçanti,” vijon gazeta e njohur.
Shqipëria ka filluar të shihet pozitivisht në Bruksel, për shkak të reformës në drejtësi, dhe në rast se kapen “peshq të mëdhenj”, mundësitë për parakalimin e Serbisë janë të mëdha.
Aq më tepër që kjo e fundit ka një problem të madh me Kosovën dhe në rast se nuk e zgjidh këtë problem, ashtu siç dhe tha komisioneri Johanes Hahn, nuk mund të bëhet pjesë e BE-së.
Vetë presidenti serb Vuçiç e ka pranuar që do jetë shumë e vështirë zgjidhja e çështjes me Kosovën dhe se për këtë, do të pyeten qytetarët.
Por, vështirë se serbët do të pranojnë të “humbasin” Kosovën./a.m.
