Artistja me origjinë shqiptare Bebe Rexha ka ndarë një rrëfim personal dhe të ndjerë me ndjekësit e saj, ku përmes disa postimeve në “InstaStory” ka hapur zemrën për betejat, padrejtësitë dhe zhgënjimet që ka përjetuar në industrinë muzikore ndër vite.
Në mesazhet e saj, Bebe reflekton mbi rrugëtimin e saj si artiste dhe sfidat që kanë ndikuar në shëndetin e saj emocional dhe profesional. Ajo nis rrëfimin me një analizë të sinqertë të përvojave që e kanë shoqëruar në karrierën muzikore.
“Kohët e fundit kam menduar shumë për rrugëtimin tim në muzikë. Dashuria ime më e madhe në jetë ka qenë të shkruaj këngë dhe t’i performoj ato. Por diku gjatë rrugës, gjithçka pushoi së qeni e thjeshtë. Gjithmonë kishte shumë ‘kuzhinierë në kuzhinë’. Shumë opsione. Dhe unë jam pjesërisht fajtore sepse doja të kënaqja të gjithë. Vetëm doja të fitoja, por e humba veten. Kur përpiqesh të ndjekësh hite, e hollin identitetin tënd,” shkruan ajo.
Më tej, këngëtarja flet për pasojat emocionale që kjo përpjekje për të kënaqur të gjithë i ka sjellë, duke ndikuar thellësisht në motivimin dhe vetëbesimin e saj si artiste.
“U dekurajova. U ndjeva e heshtur. U dorëzova. Edhe pse ndjej se fansat e mi më besnikë e kanë kuptuar çfarë po ndodhte”, rrëfen ajo.
Një prej momenteve më të forta të rrëfimit është kur Bebe ndalet te mënyra si politika brenda industrisë muzikore ka ndikuar në rrjedhën e karrierës së saj. Ajo pohon se fakti që nuk ka pranuar të jetë pjesë e interesave të mbyllura dhe nuk ka bërë kompromis me bindjet e saj, i ka sjellë pengesa të mëdha.
“Ka pasur raste kur jam ndier e anashkaluar. Më kanë mbajtur pas. Qëllimisht. Jo për shkak të talentit apo përkushtimit tim, por për shkak të politikave. Sepse nuk kam ledhatuar egot. Sepse isha e vështirë, vetëm pse mbroja veten time. U ndëshkova për vite,” shprehet këngëtarja.
Ajo nuk ngurron të flasë edhe për realitetin e hidhur të kolegëve të saj, shumë prej të cilëve, pasi janë përballur me dështime apo janë lënë mënjanë nga industria, nuk kanë pasur më mundësi për rikthim.
“Ajo që më thyen zemrën janë artistët që heshtën ose u lanë mënjanë, dhe disa prej tyre nuk kthehen më kurrë”, shton ajo me dhimbje.
Pavarësisht vështirësive, Bebe e mbyll rrëfimin e saj me forcë dhe vendosmëri, duke dhënë një mesazh frymëzues për ata që ndihen të papërfillur apo të nënvlerësuar.
“Por jo unë… Unë jam luftëtare. Dhe do ndalem vetëm kur të vdes, ose kur të zgjedh vetë të ndalem. Jo sepse disa njerëz me pushtet mendojnë se mund të më shkruajnë historinë. Ky është një kapitull i ri. Dhe unë po e marr sërish lapsin në dorë për të shkruar historinë time. Jam shumë e emocionuar për fillimin e diçkaje të re. S’mund të pres ta ndaj me ju. Kjo nuk ka të bëjë me hakmarrje. Ka të bëjë me rilindje. Për ata që janë anashkaluar, heshtur dhe quajtur të nënvlerësuar hahaha. Unë nuk kam përfunduar. Thjesht po filloj,” përfundon këngëtarja.
Ky rrëfim i sinqertë dhe emocional i Bebe Rexhës është pritur me përkrahje të madhe nga fansat në rrjetet sociale, duke reflektuar realitetin e vështirë me të cilin përballen shumë artistë në një industri shpesh të pamëshirshme.
