Autoriteti i Mbikëqyrjes Financiare zhvilloi sot një takim informues me studentë në kryeqytet, në vijim të zbatimit të Strategjisë për “Rritjen e besimit të konsumatorit/investitorit në tregjet financiare nën mbikëqyrje”.
Në fillim të fjalës së rastit, Drejtori i Përgjithshëm Ekzekutiv i AMF-së, Ervin Koçi, bëri një përshkrim të shkurtër në lidhje me financimin dhe funksionimin e Autoritetit, duke theksuar se “Autoriteti i Mbikëqyrjes Financiare është krijuar mbi bazën e Ligjit 9572 të vitit 2006 dhe është një person juridik publik i pavarur që raporton në Kuvendin e Shqipërisë.”
Më tej, Koçi theksoi se rritja e njohurive financiare janë mjeti më i mirë për të shtuar mbrojtjen për qytetarët dhe për t’i larguar ata nga abuzimet. “Eksperienca jonë e viteve të kaluara me skema financiare të gabuara, por edhe eksperienca të ngjashme botërore kanë treguar sa i rëndësishëm është një konsumator me edukim financiar të mjaftueshëm, por edhe në vazhdimësi.”
Drejtori i Përgjithshëm Ekzekutiv i AMF-së theksoi se iniciativa e nisur për edukimin financiar me studentët e pedagogët, do të zgjerohet edhe me grupe të tjera për të përcjellë informacione të thjeshta e të kuptueshme për gjithë publikun. Në funksion të mbrojtjes së konsumatorit, Autoriteti është duke punuar për përmirësimin e kuadrit ligjor dhe rregullator për tregjet nën mbikëqyrje. Për këtë, ai po bashkëpunon me partnerët ndërkombëtarë si Banka Botërore dhe ka si synim kryesor t’i japë zgjidhje problemeve të hasura deri tani në tregjet nën mbikëqyrje.
Duke iu përgjigjur pyetjeve specifike, Drejtori i Përgjithshëm Ekzekutiv i AMF-së shpjegoi se bazuar në ligjin për AMF-në, Autoriteti financohet nga tregjet nën mbikëqyrje, nuk merr para nga buxheti i shtetit dhe synon rregullimin e tregjeve financiare jo bankare, duke mbrojtur njëkohësisht interesat e konsumatorëve dhe nxitur qëndrueshmërinë, transparencën dhe besueshmërinë.
Autoriteti i Mbikëqyrjes Financiare shprehet se synon ta vijojë fushatën e edukimit financiar vitin e ardhshëm me takime të tjera në universitete, por edhe grupe të tjera interesi. /b.d
