Ambasadorja e Bashkimit Europian në Tiranë, Romana Vlahutin, në një intervistë ekskluzive dhënë për gazetaren, Ilva Tare, në emisionin “Tonight” që do të transmetohet në sonte në mbrëmje në Oraneës, ka sqaruar lidhur me rolin që do të ketë Reinhard Priebe, në procesin vetting-ut ndaj gjyqtarëve dhe prokurorëve që do të bëhen pjesë e sistemit të ri të drejtësisë. Sipas saj, Priebe ka njohuri shumë të mira për gjithë rajonin dhe procesin e zgjerimit dhe i është kërkuar atij që të ndihmojë për të bërë vettingun në mënyrën e duhur. “Ai është edhe jurist, konstitucionalist, është ish gjyqtar, kështu që sjell me vete njohuritë e veta ligjore por ka përvojë të drejtpërdrejtë me zgjerimin, kështu që në një farë mënyre, ai është ekspert dhe po ndihmon për t’i bërë gjërat”, ka deklaruar Vlahutin.
Detaje nga intervista:
Zyra e ngritur tashmë në Bruksel që drejtohet nga gjermani Priebe, me çfarë do të merret, çfarë zyre është, është e posaçme për Shqipërinë, ka ndonjë detyrë specifike?
Nuk ka zyrë në Bruksel që të jetë krijuar dhe të udhëhiqet nga zoti Priebe, është gjë tërësisht tjetër. Është një mekanizëm bashkërendimi, i cili përfshin kolegët tanë në selinë qendrore që vjen nga drejtoria e përgjithshme e zgjerimit dhe nga drejtoria e përgjithshme e drejtësisë. Ata kanë ftuar zotin Priebe i cili ka qenë zyrtar, ka dalë në pension dhe ka njohuri shumë të mira për gjithë rajonin dhe procesin e zgjerimit dhe i është kërkuar atij që të ndihmojë për të bërë vettingun në mënyrën e duhur. Ai është edhe jurist, konstitucionalist, është ish gjyqtar, kështu që sjell me vete njohuritë e veta ligjore por ka përvojë të drejtpërdrejtë me zgjerimin, kështu që në një farë mënyre, ai është ekspert dhe po ndihmon për t’i bërë gjërat.
A mund të themi se në vjeshtë Shqipëria do ta marrë rekomandimin për hapjen e negociatave?
Është shumë herët për të folur për këtë dhe për ta thënë. Sigurisht që do të varet shumë nga sa seriozë dhe sa të përgjegjshëm janë deputetët e parlamentit shqiptar dhe sa shpejtë do të fillojnë ata punën për këto çështje. Është e gjitha në duart e shqiptarëve. E keni parasysh shprehjen që topin e keni ju në anën tuaj.
