Anëtari i Komisionit të Jashtëm, socialisti Namik Dokle, ka dalë dje kundër propozimeve të ministrit të Jashtëm, Ditmir Bushati, për postet e ambasadorëve të rinj. Ministria e Jashtme ka depozituar në Kuvend emrin e Qirjako Qirkos, aktualisht sekretar i Përgjithshëm i MPJsë, si kandidat për ambasador në Britaninë e Madhe.
Po ashtu edhe Venera Domin, aktualisht sekretare e Përgjithshme në UNESCO, propozohet si ambasadore në organizatën e UNESCO-s. Por propozimi i kandidatëve që mbajnë postet e sekretarëve për Përgjithshëm në “karrige” ambasadori, sipas Dokles, është i habitshëm.
Gjatë mbledhjes së djeshme të Komisionit të Jashtëm, kryetarja Arta Dade ka njoftuar seancën dëgjimore me dy kandidatët për ambasadorë, por deputeti i PS-së ka shprehur habinë e tij për propozimet e Ministrisë së Jashtme.
“Ore, të gjithë sekretarët e Përgjithshëm u bënë ambasadorë? Ç’është kjo punë kështu?! Ka Fule dhe Fyle. Nga sekretar i Përgjithshëm, direkt ambasador?!”, ka thënë dje Namik Dokle. Mbledhja e Komisionit është mbyllur pa diskutime, për shkak se prezantimi zyrtar i kandidatëve do të bëhet sot nga Ministria e Jashtme.
UNESCO Kandidatura e Venera Domit vjen disa ditë pasi Presidenti i Republikës, Bujar Nishani, dekretoi lirimin nga detyra të Besiana Kadaresë si ambasadore e Shqipërisë pranë Organizatës së Kombeve të Bashkuara për Edukimin, Shkencën dhe Kulturën (UNESCO). Ndërkohë që Venera Domi mban aktualisht postin e sekretares së Përgjithshme në UNESCO.
Në CV-në e kandidates thuhet se: “Venera Domi është diplomate karriere me gradën ‘Ministre fuqiplotë’, aktualisht mban postin e sekretares së Përgjithshme të Komisionit Kombëtar të UNESCO-s dhe koordinatores Kombëtare të Frankofonisë dhe Aleancës së Qytetërimeve. Znj.Domi punon për Ministrinë e Punëve të Jashtme që prej vitit 1992. Ajo ka një përvojë pune të pasur në këtë institucion duke punuar në drejtori apo përfaqësi të ndryshme si zv.ambasadore në Ambasadën Shqiptare në Itali, e ngarkuar me punë në Ambasadën Shqiptare në Hungari, si dhe konsulle e Përgjithshme në Stamboll. Znj.Domi është e diplomuar për Gjuhë dhe Letërsi frënge në Universitetin e Tiranës në 1987″.
BRITANIA E MADHE
Ndërkohë që Qirjako Qirko pritet të zëvendësojë në detyrë ish-diplomatin Mal Berisha, i cili përfundoi mandatin e ambasadorit në Britaninë e Madhe. Që pas largimit të Mal Berishës, selia diplomatike në Londër është drejtuar nga e ngarkuara me punë, Entela Gjika.
Qirko vjen nga karriera diplomatike dhe sipas CV-së së MPJ-së, ai ka një provojë 28-vjeçare në diplomaci. Ai është diplomuar për Drejtësi dhe mban gradën diplomatike “Ministër fuqi plotë”.
Panorama
