Me 290 mijë objekte në process legalizimi, drejtori i ALUIZNIT, Artan Lame nuk lëviz nga objektivi për të përfunduar brenda këtij mandati qeverisës procesin në zonat informale.
“Mbeten rreth 290 mijë objekte të tjera për t’u legalizuar dhe që janë në proces për t’u legalizuar. Në fund të këtij mandati, në zonat informale do të jetë mbyllur masivisht legalizimi i tyre”, tha Lame për Ora News.
Lame shtoi se, për të përshpejtuar procesin, ALUIZNI do të shtojë stafin në drejtoritë e reja të hapura në të gjithë vendin sikurse bashkëpunimi me Hipotekën.
“Duke shtuar këta njerëz, duke pasur parasysh gjithë lehtësismet që janë bërë kohët e fundit në legjislacion për thjeshtim dokumentacioni, ky mekanizëm do të prodhojë shumë e shumë më tepër”.
Projektin për sistemin unik të hartografisë, Kreu i ALUIZNI-t e vlerëson sfidën e madhe të shtetit shqiptar në fushën e pronësisë.
“Po punon hipoteka, po punojmë dhe ne dhe të tre këto agjenci pronësie në Shqipëri po punojnë në mënyrë të rakorduar mbi një sistem hartash që shtëpia që legalizoj unë të jetë te prona që i ka dhënë hipoteka, apo të jetë dhe te pronësia ku ish-pronari do të marri paratë”.
Lame tha se aktivitetet në krah të përfaqësuesve të qeverisë për shpërndarjen e lejeve të legalizimit kishin si qëllim krijimin e besimit qytetar tek procesi.
Oranews.tv
