Policia e Pukës ka dhënë informacion zyrtar për zhdukjen e një alpinisti në Malin e Munellës këtë të enjte, i cili ndodhej në shoqërinë e 4 personave të tjerë, mes tyre edhe gazetari Alfred Lela.
Kështu policia sqaron se personat në fjalë po lëviznin në këmbë, kur dy prej tyre kanë rrëshqitur në humnerë. Pas 2 orë kërkimesh, policia thotë se u bë e mundur gjetja e njërit prej tyre. Ndërsa për alpinistin tjetër, 60-vjeçarin Ndoc Mulaj vijojnë ende kërkimet.
“Sot rreth orës 16:10, jemi njoftuar nga shtetasi A. L., se ka qenë duke eksploruar në Malin e Munellës së bashku me 4 alpinistë amatorë. Gjatë lëvizjes në këmbë, 2 prej tyre, shtetasit N. M., rreth 60 vjeç dhe I. Sh., rreth 30 vjeç, kanë rrëshkitur duke rënë në humnerë.
Menjëherë kanë nisur kërkimet nga shërbimet e Policisë, shërbimet e zjarrëfikses, pjesëtarë të shoqatës së alpinistëve Pukë të cilët janë ndihmuar dhe nga banorë të zonës.
Pas 2 orëve kërkimesh në një terren shumë të vështirë është bërë e mundur gjetja e shtetasit I. Sh., i cili po transportohet në spital për ndihmë mjekësore si dhe vazhdojnë kërkimet për gjetjen e shtetasit N. M”.
/a.r
