Prokuroria për Krimet e Rënda ka zbardhur dosjen e ish imamit Almir Daci, ku pas një sërë përgjimesh në celularin e tij janë zbuluar thirrjet ku ish imami ka kërkuar nga një shtetas me emrin Bujar Hysa që të dërgojë djem të fortë dhe të mirë në Siri. Në dosjen e zbardhur të organit të akuzës thuhet se Almir Daci i kërkonte po këtij shtetasi që kur të rekrutuarit e rinj të vinin në Siri të ishin të veshur mirë dhe të kenë me vete edhe para pasi gjëndja është e vështirë.
“Ai i raporton të hetuarit Bujar Hysa lidhur me familjen e Genci Ballës dhe me luftimet që po bëhen në Siri, si dhe i kërkon lekë për të blerë një armë të mirë. Ai i rekomandon Bujarit të dërgojë djem të mirë që të jenë të fuqishëm dhe në një rast e pyet edhe për një djalë nga Pogradeci, i cili duhej të shkonte në Siri.
Gjithashtu i kërkon Bujarit që vëllezërit që shkojnë andej të vishen mirë, të mos vijnë vetëm për 3 muaj dhe të kenë lekë me vete, se është shumë vështirë”, thuhet në dosjen e Prokurorisë.
