Trajneri i Juventusit, Massimiliano Allegri ka thënë se e ardhmja e mbrojtësit të ri Daniele Rugani është te kampioni italian. 21-vjeçari u transferua te Juve nga Empoli në verën e kaluar dhe pritej që të luante rol të rëndësishëm për “Zonjën e Vjetër” këtë sezon. Mbrojtësi ka luajtur vetëm në dy ndeshje të ligës, duke nisur spekulimet rreth të ardhmes së tij. Për të thuhet se kanë shprehur interesim Arsenali dhe Chelsea, por Allegri ka insistuar se i riu italian nuk do të largohet nga Torino.
“Rugani është fëmijë, është i mirë dhe i ri. Ai erdhi nga Empoli me vetëm një sezon të Serie A. Te Juventusi ai u takua me katër lojtarët më të fortë në Europë dhe është dashur të adoptohet me sistem krejt tjetër”, ka thënë Allegri.
“Atij nuk i duhet presioni. Menaxhimi i Ruganit dhe të rinjve tjetër varet nga unë, prandaj do të bëj më të mirën. Rugani është dhe do të jetë e ardhmja e Juventusit dhe futbollit italian”.
