Enkelejd Alibeaj ka folur për një inkriminim të Policisë së Shtetit, pasi dy drejtues të rëndësishëm të saj janë kapur sipas tij të përfshirë direkt në trafikun e drogës.
“Kjo tregon se inkriminimit të policisë i është hapur dera dhe raste të tilla nuk do të mungojnë”, ka deklaruar Alibeaj, sipas të cilit saga e inkriminimit vazhdon.
“Saimir Tahiri ka kthyer në polici dhe në një detyrë delikate, në zyrën e Interpol, Alban Ahmetajn, që u largua pak kohë më parë pasi rezultoi i përfshirë në trafikun e drogës”, ka thënë Alibeaj.
Eksponenti i PD ka kujtuar se Ahmetaj u largua nga posti i shefit të forcave operacionale pas denoncimit të PD, pasi u akuzua nga oficeri i tij, Demushi, që u kap me trafik droge.
Përveç përfshirjes në trafik, atij iu shtua edhe akuza e korrupsionit, pasi i njëjti oficer deklaroi se e kishte paguar 4 mijë euro për t’u bërë pjesë e forcave operacionale.
“Me gjithë këtë të kaluar kriminale, Tahiri e kthen sërish në detyrë Ahmetajn dhe pikërisht në Interpol. Ahmetaj është pjesë e segmentit të ngushtë të Tahirit. Largimi i Tahirit dhe pastrimi i Policisë së Shtetit është një emergjencë kombëtare. Koha nuk pret më”, ka thënë Alibeaj.
/ Top Channel
