Kreu i grupit parlamentar të PD Enkelejd Alibeaj kërkoi nga SPAK të mbyllë sa më shpejt hetimet për disa çështje të bujshme, duke përfshirë këtu inceneratorët, çështjen Bechetti dhe koncesionet në shëndetësi.
Gjatë fjalës së tij në Komisionin e Ligjeve Alibeaj u shpreh se lidhur me përmbushjen e këtij rekomandimi SPAK duhet të raportojë në Kuvend brenda tre muajve të ardhshëm.
“Të përmbyllë në një kohë sa më të shpejtë hetimet për Inceneratorët, çështjen Bechetti, koncesionet në shëndetësi. Për secilin prej tyre praktikave korruptive nga ana jonë janë depozituar prej kohësh kallëzime penale pranë SPAK. Ka kaluar një kohë relativisht e gjatë. Çështjet janë me sensibilitet publik. Janë angazhuar edhe instrumente të tjera parlamentare.
Është e nevojshme për të ruajtur integritetin dhe autoritetin e SPAK. Që të mos shndërrohen këto në hapësira për presione. Përgjigja më e shpejtë është përgjigja më e mirë ndaj pretendimeve që kemi pasur. Lidhur me përmbushjen e këtij rekomandimi të raportojë në kuvend brenda tre muajve. Të raportojë për prekjen e zgjedhjeve të lira. Dhe për këtë të raportojë në Kuvend brenda tre muajve”, deklaroi ai.
Alibeaj theksoi se duhet të merren masa për të mbrojtur pavarësinë dhe paanshmërinë e prokurorëve. “Duhet të merren masa për të mbrojtur pavarësinë dhe paanshmërinë e prokurorëve. Unë e di që drejtësia nuk ka gojë të flasë dhe të bëjë replikë me politikën.
E ka të ndaluar. Por në situata të tilla të paktën njëherë në vit të jemi ne që t’ia krijojmë këtë mundësi që sa herë goditen drejtpërdrejtë të kenë të paktën të drejtën mediatikisht përmes edhe instancave në marrëdhëniet me publikun dhe median të bëjnë reagime të tilla. Do të hiqte çfarëdolloj përshtjellimi që do i shqetësonte në punën e tyre. Nëse nuk përgjigjen rreziku është i madh. Nëse nuk përgjigjen do të thotë se presioni nga kryeministri e bëri efektin”, tha ai.
g.kosovari
