Ish-Presidenti Alfred Moisiu i ftuar në Ora Neës mbrëmjen e fundit të vitit, thotë se Presidenti i vendit duhet të zgjidhet nga populli dhe në krye të shtetit duhet të jetë një personalitet.
Ai thotë se politika kërkon një nëpunës në krye të shtetit. Për sa i përket reformës në drejtësi, ai mendon se ajo është vonuar qëllimisht nga klasa politike dhe sistemi gjyqësor.
Pjesë nga intervista:
Moisiu: Reforma në drejtësi është gjëja më e madhe. Deri më tani e kemi në letër. Është e vërtetë që periudha e realizimit të saj në letër është zgjatur më shumë se sa duhej dhe përgjegjësia është e politikës shqiptare, sepse jo të gjithë e duan këtë lloj reforme. Edhe gjyqtarët një pjesë do të japin llogari për atë që kanë bërë. Fajtore është politika që e ka vonuar sepse donte që kjo reformë, nuk guxonte të dilte kundra saj, sepse shqiptarët kanë kohë që e kërkojnë, por indirekt kërkonin ta vononin dhe ta zbusnin. Kur të fillojë implementimi do të vazhdojë kjo situatë dhe duhet vendosmëri. Kam qenë i mendimit që politika të mos fusë duart fare. Ishte ajo pjesë që do të goditej, ndërsa gjyqësori e ka çuar në Gjykatën Kushtetuese. Të gjitha këto kanë pasur një qëllim: të ulin sa më shumë të jetë e mundur “gradacionin e rakisë” në qoftë se shprehemi kështu.
Reforma në politikë?
Moisiu: Pa drejtësi të rregulluar nuk mund të rregullojmë dot politikën. Drejtësia është baza. Ne kemi akoma skandale të mëdha të viteve të ndryshme të “qepura me pe të bardhë”. E ka bërë drejtësia. Sigurisht, nuk i fus të gjithë në një thes. Atje ka njerëz të ndershëm, njerëz që janë përleshur me krimin dhe kjo nuk ka qenë e lehtë. Një pjesë goxha e mirë është e ciknosur.
Klasa politike ka përgjegjësi për këtë situatë, por nuk ka përgjegjësi njëlloj. Klasa politike duhet të bëjë akuza të argumentuara dhe që të bindin, jo akuza për të krijuar zhurmë.
Zgjedhja e Presidentit
Moisiu: Presidenti duhet zgjidhur nga populli. Politika tenton të dërgojë në Presidencë jo një kryetar shteti por një nëpunësi. Duhet zgjedhur një personalitet që di t’i japë rrugë problemeve dhe të shmanget nga politika. Ai duhet të gjejë forcat dhe të shkëputet nga politika partiake. Për fat të keq kemi pasur rezultate jo si duhet. Politika duhet të kuptojë që atë që vënë në krye duhet ta respektojnë. Edhe ai që është krye të detyrës si kryetar Shteti duhet t’i përmbahet kritereve kushtetuese. (b.an)
.,.
